Perëndimi vazhdon të jetë cak i dezinformatave ruse

Perëndimi vazhdon të jetë cak i propagandës dhe dezinformatave ruse dhe serbe.

Ministri i Jashtëm i Rusisë, Sergey Lavrov ka dezinformuar mbi qëllimet e samitit për paqen në Ukrainë, duke akuzuar Perëndimin.

“Konferenca për paqen në Ukrainë që do të mbahet në Zvicër zbret në formulimin e një ultimatumi për Rusinë… Nëse Perëndimi dëshiron të luftojë në fushën e betejës (siç thonë ata) – ata janë të mirëpritur”, ishte dezinformata që ministri i Jashtëm i Rusisë, Sergey Lavrov bëri javën që lamë pas.

Ndërsa dihet se synimi i samitit ishte që të krijojë një forum për një dialog të nivelit të lartë mbi mënyrat për të arritur një paqe gjithëpërfshirëse, të drejtë dhe të qëndrueshme për Ukrainën në përputhje me të drejtën ndërkombëtare dhe Kartën e OKB-së dhe jo sikurse dezinformoi Lavrov.

Për Perëndimin dezinformoi edhe ambasadori i Rusisë në Serbi, Aleksandar Bochan Harchenko, i cili ka hedhur teori konspirative për një luftë të supozuar hibride kundër Rusisë, ndërsa ka akuzuar Perëndimin për imponimin e rezolutës ndaj Srebrenicës. Deklaratat e tij, të cilat nxisin frikë dhe mosbesim ndaj Perëndimit, janë pjesë e propagandës më të gjerë ruse që synon justifikimin e ndërhyrjeve ruse dhe destabilizimin e rajonit.

Se NATO po përdorë Ukrainën kundër Rusisë, ishte deklarata dezinformuese e zëdhënëses së Punëve të Jashtme të Rusisë, Maria Zakharova.

Zakharova kësisoj akuzoi NATO-n se “ka abuzuar me Ukrainën” në gjoja “interesat e saj anti-ruse”, deklaratë kjo që pasqyron politikën dezinformuese të Rusisë.

E presidenti rus, Vladimir Putin ka dezinformuar se “bashkëpunimi i Rusisë dhe Kinës është fakor i stabilitetit ndërkombëtar”. Kjo deklaratë, në realitet është një shembull tjetër i propagandës që përpiqet të mbulojë agjendën reale të Rusisë dhe Kinës në skenën ndërkombëtare.

/The Geopost/