Dezinformatë në TikTok: Video i manipuluar nga viti 2022 u përdor për pretendimin se “ushtarët izraelitë po vijnë në Kosovë”

Llogaria në TikTok me emrin “fejaislame” ka publikuar një video në të cilën pretendohet se është arritur një “marrëveshje historike Kosovë–Izrael” dhe se 1.000 ushtarë izraelitë do të vendosen në veri të Kosovës.

Sipas të dhënave të disponueshme, videoja është bërë virale dhe ka grumbulluar më shumë se 300.000 shikime.

Çfarë ka publikuar Fejaislame?

“Marrëveshja Historike Kosovë Izrael – 1000 ushtarë izraelitë do të ruajnë veriun e Kosovës”

Analiza

Në këtë faqe në TikTok është publikuar një lajm tërësisht i fabrikuar, i cili mbështetet në manipulimin e materialit vizual nga e kaluara. Videoja e përdorur si “provë” daton në të vërtetë nga marsi dhe maji i vitit 2022, kur delegacioni i Kosovës, i udhëhequr nga Donika Gërvalla, zhvilloi një vizitë zyrtare në Izrael.

Në asnjë njoftim zyrtar nga ato takime të vitit 2022, e as në intervistat që ministrja e Kosovës dha atëherë për mediat izraelite, nuk është përmendur dërgimi i çfarëdo force ushtarake, e aq më pak një kontingjent prej 1.000 ushtarësh.

Kërkimi në njoftimet zyrtare të Qeverisë së Kosovës, Ministrisë së Mbrojtjes së Kosovës, Qeverisë së Izraelit, Ministrisë së Mbrojtjes së Izraelit, NATO-s dhe KFOR-it nuk gjeti asnjë informacion që konfirmon ekzistencën e një marrëveshjeje të tillë.

Po ashtu, në faqen zyrtare të NATO-s, ku publikohen rregullisht informacionet mbi aktivitetet e KFOR-it dhe ndryshimet në përbërjen e misionit, nuk ekziston asnjë lajm apo njoftim për ardhjen e trupave izraelite në Kosovë.

Kosova dhe Izraeli gjatë viteve të fundit kanë zhvilluar marrëdhënie dypalëshe. Në qershor të vitit 2024, të dy vendet nënshkruan një marrëveshje për heqjen e vizave për qytetarët e tyre, për të cilën raportuan shumë media ndërkombëtare, përfshirë edhe Associated Press.

Megjithatë, kjo marrëveshje lidhet ekskluzivisht me lëvizjen e lirë të qytetarëve dhe nuk përmban asnjë dispozitë që ka të bëjë me bashkëpunimin ushtarak apo vendosjen e ushtarëve izraelitë në Kosovë.

Përfundim

Pretendimi se ekziston një marrëveshje ndërmjet Kosovës dhe Izraelit për vendosjen e 1.000 ushtarëve izraelitë në veri të Kosovës nuk mbështetet në fakte.

Të dhënat zyrtare të NATO-s konfirmojnë se KFOR-i është misioni i vetëm ushtarak ndërkombëtar përgjegjës për sigurinë në Kosovë, ndërsa bashkëpunimi ndërmjet Kosovës dhe Izraelit përfshin marrëdhënie diplomatike, përfshirë heqjen e vizave, por jo vendosjen e forcave ushtarake.

/The GeoPost/