Rutte: NATO mbetet e përkushtuar ndaj Kosovës

“NATO është e përkushtuar ndaj Kosovës, dhe fakti që jam këtu e dëshmon këtë më së miri”, tha të martën sekretari i Përgjithshëm i NATO-s, Mark Rutte.

Rutte tha se mbështesin FSK-në, por për anëtarësimin në NATO, fillimisht duhet njohja e shtetësisë së Kosovës nga pesë vendet që ende nuk e kanë njohur.

Rutte të martën tha se për veriun kërkohet koordinim.

“Së fundmi ne kemi shtuar praninë e trupave të KFOR-it në Kosovë, kemi katërfshiuar praninë e ushtarëve tanë në veri, kemi trefishuar praninë fizike të KFOR-it në veri, dhe kjo është dëshmi se KFOR-i dëshiron të jetë prezentues i stabilitetit, jo vetëm në Kosovë, por edhe ne rajon”, ka thënë Rutte në një intervistë për Radio Televisionin e Kosovës.

I pyetur se si i sheh shqetësimet e liderëve kosovarë, të cilët Serbinë e konsiderojnë rrezik të përhershëm në raport me Kosovën dhe stabilitetin në vend dhe rajon, Rutte ritheksoi se ai është i përkushtuar në të qenit neutral, por ka përmendur nevojën që Serbia të japë përgjegjësi për atë që ka ndodhur në 2023-ën.

Shefi i NATO-s nënvizoi se SHBA është shumë e përkushtuar ndaj Ballkanit Perëndimor.

“Do të ishte mirë që dialogu të rifillonte sërish, dhe sigurisht Serbia duhet të mbajë përgjegjësi për atë që ndodhi në 2023-ën, por gjithashtu është e rëndësishme për Kosvoën që të përmbahet nga veprimet e njëanshme. Ndërtimi i mirëbesimit është i rëndësishëm dhe kjo do të ishte një bazë e mirë për diskutime të vazzhdueshme, gjithmonë me ndërmjetësimin e zyrtarëve të mirë që janë përcaktuar për dialogun Kosovë-Serbi”, tha ai./The Geopost/