Vuçeviq dezinformon për praninë e ushtrisë serbe në kufirin me Kosovën

Ai pretendon se në kufi ka prej vitesh baza ushtarake të ushtrisë serbe dhe se Serbia nuk shkel asnjë marrëveshje ndërkombëtare.

“Edhe një herë kemi në punë fantazmagorinë e Albin Kurtit, i cili as nuk e di saktësisht se çfarë do të thotë baza. Këto janë baza ushtarake të ushtrisë serbe, të cilat janë aty prej vitesh dhe Serbia nuk po shkel asnjë marrëveshje ndërkombëtare apo dokument, duke përfshirë Rezolutën 1244 të OKB-së. Fakti që Kurti tani po përpiqet të bëjë një dramë mediatike se ‘si e ashtuquajtura Kosova supozohet të jetë nën kërcënim’ nuk është gjë tjetër veçse mjegull për t’u shitur sponsorëve të tij perëndimorë.

As ai nuk është viktimë dhe as nuk rrezikohet askush, përveç popullit serb të Kosovës, të cilit Kurti po i mohon të drejtat elementare të njeriut. Faleminderit për pyetjen tuaj, ushtria serbe do të vazhdojë të forcohet dhe modernizohet, sepse ajo është garantuesi i paqes dhe sigurisë për Serbinë tonë”.

Imazhet satelitore dhe raportet nga vëzhguesit ndërkombëtarë tregojnë se Serbia ka përforcuar ndjeshëm infrastrukturën e saj ushtarake përgjatë kufirit me Kosovën gjatë viteve të fundit.

Ndërtimi i bazave të reja është një përpjekje e qartë përshkallëzimi dhe provokimi që kërcënon drejtpërdrejt paqen dhe stabilitetin në Kosovë dhe rajon.

Kryeministri Kurti ka kërkuar që të bëhet presion ndaj Serbisë për praninë e 48 bazave operative, të cilat siç ka thënë ai, kanë nga 50 deri në 150 trupa që presin një mundësi për të hyrë në Kosovë. Këto pretendime mbështeten nga raportet e vëzhguesve ndërkombëtarë që vënë në dukje rritjen e aktivitetit ushtarak nga Serbia.

Kurti shtoi se Serbia dhe Rusia janë të ngjashme për shkak të interesit të përbashkët dhe dëshirës për të zgjeruar territorin e tyre./G.Venhari-The Geopost/