Lista Serbe dhe Simiq dezinformojnë sërish për Ligjin për të Huajt, ndonëse i njëjti ligj ekziston edhe në Serbi

Lista Serbe dhe funksionari i saj Igor Simiq kanë vazhduar fushatën e dezinformimit të opinionit publik, duke pretenduar se zbatimi i Ligjit për të Huajt në Kosovë është gjoja një “plan për spastrimin etnik të serbëve”, ndonëse i njëjti ligj ekziston edhe në Serbi.

Çfarë ka deklaruar Igor Simiq?

Duke qenë i ftuar në TV Pink, Igor Simiq ka deklaruar se ligjet e Kosovës janë:

“të hartuara me qëllim të spastrimit etnik të serbëve nga Kosova”,

se “rreth 10.000 serbë” do të mbesin pa të drejtë qëndrimi,

se “7.000 persona do të mbeten në pikat kufitare”,

si dhe se ligji do të çojë në “ndarjen e familjeve” dhe në kolaps të sistemit arsimor dhe shëndetësor.

Analizë:

Ligji për të Huajt fillon të zbatohet më 15 mars, por ai nuk parashikon ndalim automatik të hyrjes, kthime masive nga pikat kufitare, as masa kolektive.

Ligji rregullon regjistrimin e qëndrimit, evidencën e hyrje-daljeve dhe detyrimet administrative për personat që nuk posedojnë dokumente të Kosovës.

Pretendimi i Simiqit se “7.000 persona do të mbeten në pikat kufitare më 15 mars” nuk ekziston në asnjë dokument zyrtar.

Institucionet e Kosovës kanë paralajmëruar qytetarët për muaj me radhë, përfshirë edhe serbët, për detyrimet që burojnë nga ky ligj dhe i kanë ftuar ata të pajisen me dokumente të Kosovës ose të rregullojnë statusin e tyre.

Ligji për të Huajt hyn në fuqi më 15 mars, por pa masa kolektive. Bëhet fjalë për një rregullim administrativ të qëndrimit, i cili ekziston edhe në shtete të tjera.

Po ashtu, Simiqi injoron faktin se i njëjti parim i Ligjit për të Huajt zbatohet edhe në Serbi.

Ligji për të Huajt i Serbisë parasheh pothuajse të njëjtat detyrime – regjistrimin e qëndrimit dhe posedimin e dokumentacionit të vlefshëm.

Ajo që në Serbi konsiderohet detyrim administrativ, Lista Serbe në Kosovë e shpall “spastrimi etnik”.

The GEOPOST