Zaharova përhap narrativë të rreme për “shpalljen e serbëve të huaj” në Kosovë

Zëdhënësja e Ministrisë së Punëve të Jashtme të Rusisë, Maria Zaharova, ka dezinformuar duke pretenduar se zbatimi e Ligjit për të Huajt në Kosovë i “shpall serbët të huaj” dhe se atyre u “ndalohet qëndrimi më i gjatë se tre ditë”.

Këto pretendime janë përhapur edhe nga portali propagandistik rus Sputnik Srbija, si dhe nga media të tjera pro-regjim në Serbi, të cilat kanë transmetuar deklaratën e saj se gjoja “Kurti po shtyn pastrimin”.

Çfarë ka deklaruar Zaharova?

“Sapo ka filluar tallja me të drejtat e serbëve. Kryeministri Kurti, të cilin Perëndimi e ka përkëdhelur, për të mos thënë e ka prishur duke i lejuar gjithçka, ka paralajmëruar se më 15 mars do të nisë zbatimi i të ashtuquajturit ligj për të huajt, i cili ua ndalon qëndrimin në krahinë më shumë se tri ditë të gjithë atyre që nuk kanë shtetësi ose leje të Kosovës.

Në këtë mënyrë, serbët që jetojnë në territoret e tyre historike, punojnë dhe shkollohen, praktikisht shpallen të huaj”, ka deklaruar Maria Zaharova.

Analizë:

Zaharova dezinformon kur pretendon se Ligji për të Huajt “ndalon qëndrimin më të gjatë se tri ditë” për personat pa shtetësi kosovare.

Në fakt, ligji nuk parasheh ndalim qëndrimi, por vetëm detyrim për regjistrim. Shtetasit e huaj mund të qëndrojnë në Kosovë deri në 90 ditë brenda një periudhe 180-ditore, pa vizë apo leje të veçantë.

Sipas tekstit zyrtar, ligji rregullon hyrjen, lëvizjen, qëndrimin dhe daljen e të huajve nga territori i Kosovës, ku i huaj konsiderohet çdo person që nuk është shtetas i Republikës së Kosovës.

Po ashtu, Zaharova dezinformon kur pretendon se ligji është i drejtuar kundër serbëve me qëllim që ata të “shpallen të huaj”. Në realitet, ligji zbatohet për të gjitha personat që nuk posedojnë dokumente të Republikës së Kosovës, pavarësisht përkatësisë etnike.

Serbët që jetojnë në Kosovë dhe posedojnë letërnjoftime të Kosovës – gjë e paraparë dhe e dakorduar me Marrëveshjen e Brukselit – nuk përfshihen në këtë ligj.

Ligji gjithashtu fut kategorinë e “migrantëve ditorë” (Neni 3/1.6), për personat që jetojnë në Serbinë qendrore dhe çdo ditë hyjnë në Kosovë për punë ose shkollim.

The Geo Post