Nëntë vende rrëzojnë pretendimin e Rusisë për mbylljen e Mekanizmit Ndërkombëtar Penal

Nëntë shtete kanë hedhur poshtë pretendimet e Federatës Ruse se Mekanizmi Ndërkombëtar i Mbetur për Gjykatat Penale (IRMCT) ka pushuar së ekzistuari më 1 korrik, duke theksuar se institucioni vazhdon të funksionojë në përputhje me statutin e tij dhe rezolutat përkatëse të Këshillit të Sigurimit të Kombeve të Bashkuara.

Në një letër të përbashkët të datës 28 korrik, drejtuar Sekretarit të Përgjithshëm të OKB-së, Antonio Guterres, dhe presidentit të Këshillit të Sigurimit, përfaqësuesit e përhershëm të Bahreinit, Kolumbisë, Danimarkës, Francës, Greqisë, Letonisë, Panamasë, Mbretërisë së Bashkuar dhe Shteteve të Bashkuara kundërshtojnë qëndrimin e Moskës, të paraqitur në letrat e 2 dhe 21 korrikut.

“Analiza e përfshirë në këto letra dhe përfundimet e tyre janë të pasakta”, thuhet në reagimin e nëntë shteteve.

Sipas tyre, rezoluta 1966 (2010) e Këshillit të Sigurimit përcakton qartë se Mekanizmi vazhdon të funksionojë për periudha dyvjeçare pas çdo rishikimi të punës së tij, përveç rasteve kur Këshilli vendos ndryshe.

Në letër theksohet se Këshilli i Sigurimit ka zhvilluar për muaj të tërë procesin e rishikimit të punës së Mekanizmit dhe se fakti që nuk është arritur konsensus për një rezolutë të re nuk nënkupton ndërprerjen e mandatit të tij.

“Fakti që procesi i rishikimit nuk ka përfunduar me konsensus nuk e ndryshon realitetin se rishikimi është kryer”, theksojnë shtetet nënshkruese.

Ato shtojnë se mungesa e një rezolute të re nuk përbën kusht për vazhdimin e funksionimit të Mekanizmit, pasi Këshilli i Sigurimit nuk ka marrë asnjë vendim për mbylljen e tij.

“Këshilli nuk ka marrë një vendim pozitiv për mbylljen e Mekanizmit dhe, për këtë arsye, ai vijon të funksionojë në përputhje me statutin e tij dhe rezolutat në fuqi të Këshillit të Sigurimit”, thuhet në letër.

Sipas dokumentit, ky interpretim mbështetet edhe nga Sekretariati i OKB-së.

Më 1 korrik 2026, Sekretari i Përgjithshëm Antonio Guterres informoi Këshillin e Sigurimit për riemërimin e gjyqtarëve të Mekanizmit, si dhe të gjyqtares Gatti Santana në postin e presidentes së institucionit.

Në fund të letrës, nëntë shtetet theksojnë se Këshilli i Sigurimit duhet të vazhdojë punën për reformat e planifikuara, duke përfshirë uljen e kostove, mbylljen e dy strukturave kryesore të Mekanizmit, transferimin e arkivave dhe riorganizimin e funksioneve të mbetura.

“Ne mbetemi të gatshëm të marrim pjesë në konsultime për të arritur reforma të rëndësishme dhe të përgjegjshme, pa cenuar trashëgiminë e rëndësishme të drejtësisë penale ndërkombëtare që lidhet me Mekanizmin dhe institucionet që e kanë paraprirë atë”, përfundon letra.

The GeoPost