Putini po nxiton ta detyrojë Ukrainën të pranojë një marrëveshje të pafavorshme para ndryshimit të Kongresit

Presidenti rus, Vladimir Putin, po përpiqet të përshpejtojë negociatat për përfundimin e luftës në Ukrainë, duke ushtruar presion ndaj Kievit për të pranuar një marrëveshje të pafavorshme, përpara se përbërja e re e Kongresit amerikan të nisë punën në janar.

Kështu ka vlerësuar kongresmeni demokrat amerikan, George Whitesides, sipas të cilit presidenti Donald Trump dhe homologu i tij rus po përpiqen të shfrytëzojnë kohën e mbetur përpara ndryshimit të balancave politike në Uashington.

Në një artikull autorial të publikuar të hënën në gazetën amerikane “The Hill”, Whitesides ka argumentuar se rezultatet e zgjedhjeve të mesmandatit, të mbajtura më 3 nëntor, mund t’ia kufizojnë Shtëpisë së Bardhë ndikimin mbi politikën amerikane ndaj Ukrainës.

“Duke e ditur se ndikimi i tyre politik po shkon drejt fundit, Trump dhe Putin po nxitojnë ta detyrojnë Ukrainën të pranojë një marrëveshje të keqe, para se në janar të vijë një Kongres i ri, pro-Ukrainës, që mund t’i ndalojë ata”, ka shkruar kongresmeni.

Sipas tij, presioni ndaj Kievit lidhet edhe me përpjekjet e Moskës për të mbrojtur sektorin e saj energjetik nga sulmet ukrainase me dronë me rreze të gjatë veprimi.

Whitesides ka përmendur marrëveshjen e 9 tetorit mes Trumpit dhe Putinit, përmes së cilës, sipas tij, është synuar rikthimi në tregun amerikan dhe atë ndërkombëtar i naftës ruse që ishte nën sanksione, në këmbim të ndalimit të sulmeve ukrainase ndaj rafinerive ruse.

Ai vlerëson se fushata ukrainase e sulmeve me dronë ka shkaktuar dëme të konsiderueshme në industrinë ruse të përpunimit të naftës dhe ka krijuar probleme për Kremlinin.

“Putini nuk është në gjendje t’i ndalojë dronët me sistemet e tij të mbrojtjes ajrore – dronë që kanë arritur madje deri në Moskë. Kështu, ai ka angazhuar presidentin amerikan që të shërbejë si mburojë për sektorin energjetik rus, duke i siguruar Kremlinit, në mënyrë të njëanshme, një burim të ri të ardhurash në mes të luftës”, ka deklaruar Whitesides.

Kongresmeni demokrat ka ngritur gjithashtu shqetësime për veprimet e administratës Trump ndaj Ukrainës, duke pretenduar se Uashingtoni nuk e ka paralajmëruar Kievin për raketat balistike ruse dhe i ka kërkuar Pentagonit të vendosë kufizime në shpejtësinë e terminaleve të komunikimit satelitor ushtarak Starshield.

Ai ka përmendur edhe presionin ndaj vendeve evropiane për transferimin e miliarda dollarëve nga asetet ruse të ngrira nën kontrollin e Uashingtonit, si pjesë e përpjekjeve për të rifilluar negociatat e paqes.

Megjithatë, Whitesides beson se një fitore e demokratëve në zgjedhjet për Dhomën e Përfaqësuesve, e veçanërisht në të dyja dhomat e Kongresit, mund të ndryshojë ndjeshëm qasjen amerikane ndaj luftës në Ukrainë.

Sipas tij, Kongresi i ri do të mund të miratonte masa ligjore për të garantuar vazhdimin e shkëmbimit të informacioneve të inteligjencës me Ukrainën, qasjen e saj në sistemin Starshield dhe ndihmën ushtarake shumëvjeçare.

Po ashtu, ai do të mund të ndërmerrte hapa për të siguruar që asetet sovrane ruse të ngrira të mos zhbllokohen.

Whitesides ka bërë të ditur se edhe një grup senatorësh nga të dyja partitë, përfshirë republikanët Mitch McConnell dhe John Cornyn, po i bëjnë thirrje Trumpit të tërhiqet nga marrëveshja që lidhet me karburantin dizel rus.

Duke folur për situatën në Rusi, kongresmeni ka vlerësuar se problemet ekonomike, normat e larta të interesit dhe mungesa e fuqisë punëtore po e shtojnë presionin ndaj Kremlinit.

Sipas tij, Putini dëshiron ta dobësojë Ukrainën dhe ta detyrojë atë të bëjë lëshime përpara se ndryshimet në Kongresin amerikan t’ia kufizojnë Trumpit mundësinë për të ndikuar në zhvillimet e mëtejshme.

Në përfundim, Whitesides u ka bërë thirrje autoriteteve ukrainase dhe aleatëve evropianë që të qëndrojnë të palëkundur deri në fund të vitit, të vazhdojnë kundërshtimin ndaj agresionit rus dhe të parandalojnë zhbllokimin e aseteve ruse.

“Ukrainasit nuk do ta sakrifikojnë mbijetesën e tyre vetëm për t’i shpëtuar Trumpin dhe Putinin nga agjendat e tyre përkatëse politike”, ka theksuar ai.

Zgjedhjet e mesmandatit në SHBA mbahen më 3 nëntor, ku qytetarët amerikanë votojnë për të 435 anëtarët e Dhomës së Përfaqësuesve, 35 senatorë dhe një numër guvernatorësh në shtete të ndryshme. Përbërja e re e Kongresit pritet të nisë punën në janar.

The GeoPost