BE-ja, paketën e 20-të të sanksioneve ndaj Rusisë

Presidentja e Komisionit Evropian, Ursula von der Leyen, njoftoi sot prezantimin e paketës së 20-të të sanksioneve kundër Rusisë, ndërsa theksoi progresin drejt një “Kornize të vetme për Prosperitet” me Ukrainën dhe partnerët amerikanë.

Në një postim në rrjetin X, pas një bisede me Presidentin ukrainas Volodymyr Zelensky, von der Leyen tha se paketa e ardhshme e sanksioneve synon të ushtrojë presion të ri mbi Moskën për t’u ulur në tryezën e negociatave me qëllimin e sinqertë për të arritur paqen.

“Ndërsa i afrohemi vitit të katërt të një lufte brutale kundër Ukrainës, Rusia vazhdon të dyfishojë krimet e luftës, duke sulmuar infrastrukturën civile dhe shtëpitë. Ditë pas dite, vit pas viti, mbështetja e Evropës për Ukrainën mbetet e palëkundur. Ne po dërgojmë qindra gjeneratorë për të mbajtur ndezur ngrohjen dhe dritat. Po ashtu, paraqitëm një propozim kredie prej 90 miliardë eurosh për dy vitet e ardhshme”, shkroi ajo.

Presidenti ukrainas Zelensky njoftoi më parë se raundi i ardhshëm i negociatave trepalëshe midis Ukrainës, Shteteve të Bashkuara dhe Rusisë për përfundimin e luftës do të mbahet më 4 dhe 5 shkurt në Abu Dhabi të Emirateve të Bashkuara Arabe.

Kjo paketë sanksionesh dhe raundi i negociatave vijnë në një moment kur konflikti në Ukrainë po hyn në vitin e katërt, duke shënuar një periudhë të tensionuar dhe të ndjeshme për stabilitetin rajonal dhe global.