Mbretëria e Bashkuar përditëson këshillat e udhëtimit për veriun e Kosovës

Qeveria e Mbretërisë së Bashkuar ka përditësuar udhëzimet e saj për udhëtimet në Kosovë, duke hequr rekomandimin kundër të gjitha udhëtimeve përveç atyre thelbësore në komunat veriore të Zveçanit, Zubin Potokut dhe Leposaviqit, si dhe në zonat e Mitrovicës së Veriut në veri të lumit Ibër.

Sipas njoftimit të publikuar më 10 qershor 2026 nga Zyra e Jashtme, Komonuelthit dhe Zhvillimit e Mbretërisë së Bashkuar (FCDO), ndryshimi pasqyron një rivlerësim të situatës së sigurisë në veri të Kosovës.

Megjithatë, autoritetet britanike theksojnë se udhëtarët duhet të vazhdojnë të tregojnë kujdes, të informohen për gjendjen e sigurisë para udhëtimit dhe të ndjekin udhëzimet e autoriteteve lokale.

Në përditësimin e fundit, FCDO u bën thirrje qytetarëve britanikë që para udhëtimit të sigurohen se kanë sigurim të përshtatshëm udhëtimi, i cili mbulon itinerarin, aktivitetet e planifikuara dhe shpenzimet emergjente.

Ndërkaq, udhëzimi thekson se asnjë udhëtim nuk mund të garantohet plotësisht i sigurt dhe rekomandon që udhëtarët të konsultojnë rregullisht këshillat zyrtare për sigurinë, shëndetin dhe kushtet e hyrjes në Kosovë.

Ndryshimi i qëndrimit të Londrës vjen pas një periudhe tensionesh dhe incidentesh të sigurisë në veri të Kosovës, të cilat në vitet e fundit kishin nxitur autoritetet britanike të mbanin paralajmërime më të ashpra për udhëtimet në këtë pjesë të vendit.

The GeoPost