Ballkani Perëndimor drejt “Roam Like at Home” me BE-në – vendimi kalon përmes Këshillit

Përfshirja e vendeve të Ballkanit Perëndimor në zonën e roaming-ut të Bashkimit Evropian do të varet nga përputhshmëria e plotë me legjislacionin përkatës të BE-së dhe nga gatishmëria e secilit partner për të lidhur marrëveshje dypalëshe me Brukselin.

Kështu ka deklaruar një zëdhënës i Komisioni Evropian për European Western Balkans (EWB), duke dhënë detaje mbi propozimin e fundit të Komisionit drejtuar Këshillit për zgjerimin e zonës së roaming-ut të BE-së në partnerët e rajonit.

“Parakushti për të hyrë në zonën e roaming-ut të BE-së është përputhshmëria me legjislacionin përkatës të BE-së për roaming. Procesi është kompleks dhe afatet kohore do të varen nga gatishmëria e secilit Partner të Ballkanit Perëndimor për të lidhur një marrëveshje dypalëshe me BE-në dhe për të siguruar përputhshmëri të plotë me legjislacionin përkatës”, theksoi zëdhënësi, duke shtuar se Komisioni po e mbështet rajonin gjatë këtij procesi.

Nga ana tjetër, Këshilli i Bashkëpunimit Rajonal (RCC) kujton rolin e tij në krijimin e regjimit “Roam Like at Home” në Ballkanin Perëndimor, i cili hyri në fuqi më 1 korrik 2021.

Sipas RCC-së, përmes bashkëpunimit të qeverive të rajonit, organeve rregullatore dhe operatorëve të telekomunikacionit, Ballkani Perëndimor u shndërrua në një zonë pa tarifa roaming, duke shënuar një hap të rëndësishëm drejt integrimit me tregun e vetëm dixhital të BE-së.

RCC thekson se, në bashkëpunim me partnerët evropianë, u koordinua edhe procesi i uljes graduale të çmimeve të roaming-ut mes BE-së dhe Ballkanit Perëndimor, çka ka sjellë tashmë ulje të ndjeshme të kostove për qytetarët dhe bizneset.

Megjithatë, faza e ardhshme – përfshirja e mundshme e ekonomive të rajonit në regjimin “Roam Like at Home” me BE-në – do të duhet të realizohet përmes marrëveshjeve dypalëshe dhe përafrimit me kuadrin ligjor dhe të tregut të BE-së.

Sipas RCC-së, marrëveshjet ekzistuese të stabilizim-asociimit nuk ofrojnë një model të ngjashëm me atë të përdorur për Ukrainën dhe Moldavinë, prandaj përgjegjësia kryesore për këtë proces aktualisht i takon Komisionit Evropian.

RCC përfundon se mbetet një mbështetës i fuqishëm i heqjes së barrierave të roaming-ut dhe i integrimit dixhital të rajonit me Bashkimin Evropian, duke ofruar mbështetje për Komisionin në çështjet që lidhen me koordinimin rajonal.

The Geopost