Rusia ndërmerr sulme ndaj Odesës, në përgjigje të goditjes ndaj urës në Krime

Forcat ukrainase rrëzuan 25 dronë dhe gjashtë raketa të përdorura nga Rusia për të sulmuar portin e Odesës të martën, thanë autoritetet në Kiev.

Sulmet ndodhën një ditë pasi Moska u tërhoq nga marrëveshja që mundësonte eksportin e drithit ukrainas nga ky qytet në breg të Detit të Zi.

Forcat ruse fillimisht u përpoqën të paralizonin mbrojtjen ajrore të Ukrainës me dronë dhe më pas vunë në shënjestër Odesën me gjashtë raketa “Kalibr”, tha Komanda Jugore e ushtrisë ukrainase.

Të gjashtë raketat dhe 25 dronët u rrëzuan nga mbrojtja ajrore në rajonin e Odesës dhe zona të tjera në jug, por rënia e tyre shkaktoi dëme në disa objekte portuale dhe ndërtesa banimi, duke plagosur një të moshuar në shtëpinë e tij, thanë zyrtarët.

Rusia tha se vendimi për pezullimin e marrëveshjes për eksportin e grurit nuk kishte lidhje me sulmin e së hënës ndaj një ure kyçe midis Krimesë dhe Rusisë, për të cilin Kremlini fajësoi forcat e Kievit.

Zyrtarët ukrainas nuk e pranuan drejtpërdrejt përgjegjësinë, por agjencia e sigurisë e Ukrainës la të nënkuptohej se kishte luajtur rol në sulm.

Rusia i cilësoi sulmet e së martës ndaj Odesës dhe Mykolaivit përgjatë bregut të Detit të Zi, si “hakmarrje” ndaj goditjes së urës.

Andriy Yermak, kreu i zyrës presidenciale të Ukrainës, tha se sulmi në Odesa tregoi se Kremlini është gati të rrezikojë jetën e miliona njerëzve në mbarë botën që kanë nevojë për eksportet e grurit ukrainas./REL/