Patriarku rus dezinformon për sulmin terrorist në Moskë: Ka skenarë ndërkombëtarë kundër Rusisë, si NATO kundër Jugosllavisë

Kreu i Kishës Ortodokse Ruse, patriarku Kirill ka propaganduar se në Rusi po luhen skenarë të faktorëve fetarë dhe ndërkombëtarë, siç tha ai, si në Jugosllavi në vitin 1999. Ai po ashtu dezinformoi duke thënë se NATO kreu agresion kundër Jugosllavisë.

Çka deklaroi patriarku Kirill?

“Ashtu si gjatë agresionit të NATO-s kundër Jugosllavisë në vitin 1999, edhe tani në Rusi po luhen skenarë të faktorëve fetarë dhe ndërkombëtarë. Ne e kuptojmë shumë mirë këtë duke vëzhguar ata që qëndrojnë pas sulmit në ‘Crocus City Hall’, si autorë të drejtpërdrejtë të këtij krimi. Ne e kuptojmë që ata që nuk e mendojnë mirë Rusinë ‘u përpoqën të përfitojnë nga problemet e brendshme me situatën e migrantëve, të shtrëngojnë marrëdhëniet ndëretnike në vendin tonë, duke përdorur faktorin radikal islamik.’”

Analiza:

Kreu i Kishës Ortodokse Ruse dezinformon kur thotë se kundër Jugosllavisë ka pasur skenarë të faktorëve fetarë dhe ndërkombëtarë kur në realitet ajo që çoi në shpërbërjen e Jugosllavisë ishte rritja e nacionalizmit serb kundër etnive të tjera gjë që shkaktoi edhe luftërat në Kosovë, Bosnjë e Hercegovinë e Kroaci, ku u krye gjenocid dhe spastrim etnik nga regjimi gjenocidal i Sllobodan Millosheviqit kundër shqiptarëve, boshnjakëve dhe kroatëve. Pra, Kirill po e përhap qëllimisht këtë propagandë sepse arsyeja që nxiti kryengritjen e shqiptarëve, boshnjakëve e kroatëve kundër regjimit jugosllav ishte diskriminimi e vrasja e tyre me bazë etnike dhe nuk ka pasur ndonjë nxitje për shkak të fesë. NATO më 1999 kishte ndërhyrë për të ndalur këtë spastrim etnik dhe për të parandaluar përhapjen e një konflikti më të gjerë rajonal.

/The Geopost