Edhe ambasadori rus në Uashington dezinformoi për sulmin me raketa në spitalin e Kievit

Ambasadori rus në Uashington, Anatoly Antonov, ka akuzuar Perëndimin për atë që ai tha se ishte një fshehje hipokrite e fakteve në lidhje me sulmin e fundit në spitalin “Okmatdit” në Kiev. Sikurse bëri zëdhënësja e Jashtme e Rusisë, Maria Zakharova, edhe ai dezinformoi se gjoja spitali është goditur nga një raketë kundërajrore ukrainase, dhe jo nga ajo ruse.

Antonov tha:

“Kjo nuk është hera e parë që regjimi i Kievit ia atribuon Rusisë krimet e veta barbare. Perëndimi duhet të ndalojë furnizimin e banditëve me armë që po vrasin civilë në Rusi dhe Ukrainë. Por realiteti është se incidenti në spital, i cili ndodhi në prag të samitit të NATO-s në Uashington, me sa duket u prit si një ‘dhuratë e madhe’ për të justifikuar përshkallëzimin e mëtejshëm të konfliktit dhe vazhdimin e luftës deri në vdekjen e ukrainasit të fundit.”

Analiza:

Antonov dezinformoi për të fajësuar Ukrainën për sulmin, duke pretenduar se forcat ukrainase ishin përgjegjëse për vdekjet e civilëve.

Kjo taktikë përdoret për të larguar vëmendjen nga operacionet ushtarake ruse dhe krimet gjatë luftës në Ukrainë.

Zyrtarët nga Ukraina gjithashtu i kanë hedhur poshtë këto pretendime, duke deklaruar se provat tregojnë qartë përgjegjësinë e forcave ruse për sulmet ndaj objektivave civile.

Ministria e Jashtme e Ukrainës tha të martën se përgjegjësia për sulmin në spitalin ‘Okmatdit’ në Kiev nuk bie vetëm tek lideri rus Vladimir Putin, por edhe tek të gjithë rusët, si dhe tek kompanitë ruse dhe të huaja që e mbështesin dhe financojnë atë.

Prandaj, qëllimi i të gjitha këtyre deklaratave është të largojë vëmendjen nga përgjegjësia e Rusisë për agresionin dhe të mbështesë narrativën “e një Perëndimi ‘armiqësor’”.

Ekipet e shpëtimit në Ukrainë kanë vazhduar kërkimet edhe të martën në rrënojat e spitalit më të madh të fëmijëve për më shumë të vdekur dhe të plagosur, pasi autoritetet ukrainase thanë se një raketë ruse rrafshoi një krah të objektit duke vrarë të paktën 42 njerëz në të gjithë vendin./The Geopost/