Dodik dezinformon: Kroacia kreu gjenocid ndaj serbëve, në Srebrenicë kishte luftë civile

Presidenti i entitetit Republika Srpska, Milorad Dodik, ka mohuar sërish gjenocidin në Srebrenicë pavarësisht që OKB e njohu edhe zyrtarisht atë. Ai ka dezinformuar se aty ka pasur luftë civile duke thënë se Serbia s’ka pasur njësi ushtarake në Srebrenicë, ndërsa ka akuzuar Kroacinë se ka ushtruar gjenocid ndaj popullit serb.

Çka deklaroi Dodik?

“Pas sponsorizimit të rezolutës për Srebrenicën, Kroacia duhet të heshtë sepse ishte vetë ajo që kreu gjenocidin e padiskutueshëm ndaj popullit serb. Sigurisht, Kroacia mori pjesë aktive në luftën civile në Bosnje dhe Hercegovinë, për dallim nga Serbia, e cila nuk kishte asnjë njësi ushtarake në territorin e Bosnjë-Hercegovinës”.

Analiza:

Vrasjet brutale të muslimanëve boshnjakë në Srebrenicë nga ushtria e Republika Srpska u njohën si akt gjenocidi nga Gjykata Ndërkombëtare e Drejtësisë (GJND) si dhe nga Gjykata Penale Ndërkombëtare për ish-Jugosllavinë (ICTY). Më shumë se 8,000 burrave dhe djemve myslimanë boshnjakë në dhe rreth qytetit të Srebrenicës u ndanë nga familjet e tyre dhe u tortuaruan, vranë dhe u masakruan nga forcat serbe për shkak se ishin boshnjakë. Ata ishin civilë të paarmatosur që po shtypeshin nga ushtria serbe. Prandaj, Dodik dezinformon duke mohuar gjenocidin se aty kishte luftë civile dhe gjithashtu se aty nuk kishte njësi të ushtrisë serbe, ndërsa të dhënat e dokumentuara nga institucione e organizata kredibile ndërkombëtare vërtetuan të kundërtën. Vrasjet u kryen nga njësitë e Ushtrisë Serbe të Bosnjës të Republika Srpska (VRS) nën komandën e Ratko Mlladić. Në masakër morën pjesë edhe Scorpions, një njësi paraushtarake nga Serbia, e cila kishte qenë pjesë e Ministrisë së Brendshme të Serbisë deri në vitin 1991.
Gjithashtu, Dodik me qëllim dezinformon kur thotë se Kroacia ka kryer gjenocid ndaj serbëve. Asnjë raport ndërkombëtar nuk e thotë këtë dhe në këtë luftë Kroacia ishte në anën e boshnjakëve të pafajshëm./The Geopost/