Zyrtari i lartë rus në Banjallukë, Dodik shprehet hapur kundër sanksioneve ndaj Rusisë

Rusia do të mbrojë interesat e Republikës Srpska dhe Marrëveshjen e Dejtonit, tha zëvendësministri i Punëve të Jashtme i Federatës Ruse Alexander Grushko, i cili u takua me zyrtarë të këtij entiteti të BiH në Banja Luka më 21 prill.

Ai akuzoi vendet perëndimore, “veçanërisht Berlinin dhe Londrën, se duan t’u heqin pushtetet kushtetuese serbëve dhe të marrin kontrollin”.

“Sanksionet nuk mund të ndikojnë në marrëdhëniet tona dypalëshe dhe ne do të ndjekim zbatimin e bashkëpunimit tonë përmes një axhende të dakordësuar”, tha Grushko në një konferencë për shtyp, duke kritikuar gjithashtu institucionin e Përfaqësuesit të Lartë në BiH.

Bosnja dhe Hercegovina i është bashkuar sanksioneve të BE-së kundër Rusisë, por zbatimi i tyre kundërshtohet nga përfaqësuesit e qeverisë së RS-së, të udhëhequr nga Milorad Dodik, president i Aleancës së Social Demokratëve të Pavarur.

Grushko është zyrtari i parë rus i këtij rangu që vjen në RS që nga fillimi i pushtimit rus të Ukrainës.

BE-ja dhe Ambasada e SHBA-së në BiH nuk iu përgjigjën kërkesave të Radios Evropa e Lirë për koment mbi vizitën e paralajmëruar.

Milorad Dodik tha se ai “mbështet Operacionin Special Ushtarak Rus në Ukrainë dhe se Republika Srpska nuk do të lejojë që të vendosen sanksione ndaj Rusisë”.

Rusia filloi sulmin e saj ndaj Ukrainës në vitin 2022, nën pretekstin e kryerjes së një “operacioni ushtarak special” dhe jo të një lufte kundër një vendi fqinj të pavarur, një pjesë të territorit të të cilit e kishte aneksuar.

Dodik trajtoi edhe çështjen e pronës shtetërore.

“Nëse lind çështja e pronës, RS do të duhet të marrë vendimin e vet për këtë, dhe do të jetë se nuk e pranojmë atë dhe se jemi gati për zhvillim të pavarur”, tha Dodik.

Në vitin 2006, Përfaqësuesi i Lartë në BiH përjashtoi pronën ushtarake premtuese nga vendimi për të ndaluar asgjësimin e pronës shtetërore, në mënyrë që ajo të mund të regjistrohej menjëherë në shtet.

Ligji i Mbrojtjes i BiH përcaktonte që Ministria e Mbrojtjes e shtetit do të merrte pronësinë e pronës së nevojshme për funksionimin e Forcave të Armatosura që nga 1 janari 2006.

Presidenca e BeH-së, si Komandant Suprem i Forcave të Armatosura, nëpërmjet disa vendimeve përcaktoi planin, strukturën dhe vendndodhjet e Forcave të Armatosura, dhe përpiloi një listë prej 63 vendndodhjesh të pronave ushtarake premtuese. Ky numër më vonë u reduktua në 57.

Vizitat nga zyrtarët e lartë

Zyrtarët e lartë rusë rrallë e vizitojnë Banja Llukën, qytetin dhe qendrën më të madhe administrative të RS-së.

Vizitat janë kryesisht në nivel qyteti, siç ishte vizita e përfaqësuesve të Drejtorisë Kryesore të Ministrisë së Punëve të Brendshme të Federatës Ruse për qytetin e Moskës në Ministrinë e Punëve të Brendshme të këtij entiteti në nëntor të vitit të kaluar.

Banja Luka vizitohet shpesh edhe nga përfaqësues të sektorëve të arsimit dhe kujdesit shëndetësor rus, të cilët qëndrojnë në Universitetin e Banja Lukës ose në Qendrën Klinike Universitare.

Në 10 vitet e fundit, zyrtarë të lartë rusë e kanë vizituar RS-në tri herë.

Sergei Lavrov, Ministri i Jashtëm rus, vizitoi për herë të fundit BiH në dhjetor 2020. Në atë kohë, ai ishte në një vizitë zyrtare në Sarajevë, por vizitoi edhe Sarajevën Lindore.

Dy vjet më parë, pasi vizitoi Sarajevën, Lavrov qëndroi në Banja Luka dhe vizitoi vendin e ndërtimit të një tempulli dhe qendre kulturore serbo-ruse.

Disa muaj para tij, Valentina Matviyenko, presidentja e Këshillit të Federatës Ruse, dhoma e lartë e parlamentit shtetëror, ishte në Banja Luka.

Më pas ajo deklaroi se ky entitet është një “vend vëllazëror i Rusisë” dhe se Moska është kundër zgjerimit të NATO-s në Evropë.

The Geopost