Kallas dhe Kos: Evropa nuk toleron mohimin e gjenocidit dhe glorifikimin e kriminelëve të luftës

Nuk ka vend në Evropë për mohimin e gjenocidit, revizionizmin historik apo glorifikimin e kriminelëve të luftës të dënuar, thanë Përfaqësuesja e Lartë e BE-së për Punët e Jashtme dhe Sigurinë Kaja Kallas dhe Komisionerja Evropiane për Zgjerimin Marta Kos në një deklaratë të përbashkët të lëshuar sot përpara 31-vjetorit të gjenocidit të Srebrenicës më 11 korrik.

Ata kujtuan se nesër Evropa do të përkujtojë më shumë se 8,300 burra dhe djem boshnjakë që u vranë në Srebrenicë 31 vjet më parë.

“Mendimet tona janë me familjet e viktimave të gjenocidit. Ne ndajmë hidhërimin e atyre që ende nuk e dinë fatin e të dashurve të tyre dhe qëndrojmë me ata që mbijetuan ngjarjet e korrikut 1995”, thanë Kallas dhe Kos.

Duke e përshkruar gjenocidin e Srebrenicës si një nga kapitujt më të errët në historinë e Evropës, ata theksuan se ai duhet të shërbejë si një angazhim i qëndrueshëm për ndërtimin e shoqërive paqësore, mbrojtjen e jetës dhe dinjitetit njerëzor dhe mbështetjen e vlerave themelore mbi të cilat u themelua Bashkimi Evropian.

“Ne i nderojmë viktimat duke kërkuar të vërtetën, duke ruajtur kujtimin e tyre dhe duke u siguruar që mësimet e Srebrenicës t’u kalohen brezave të ardhshëm. Ky ishte edhe qëllimi i rezolutës së OKB-së të miratuar dy vjet më parë, e cila shpalli 11 korrikun si Ditën Ndërkombëtare të Reflektimit dhe Përkujtimit të Gjenocidit të vitit 1995 në Srebrenicë”, deklaruan Kallas dhe Kos.

Ata përsëritën se nuk ka vend në Evropë për ata që mohojnë gjenocidin ose lavdërojnë kriminelët e luftës të dënuar.

“U bëjmë thirrje udhëheqësve në Bosnjë dhe Hercegovinë dhe në të gjithë rajonin të zgjedhin përgjegjësinë mbi ndarjen, dialogun mbi përballjen dhe të mbështesin procesin e vazhdueshëm të gjetjes dhe identifikimit të viktimave të mbetura”, shtuan dy zyrtarët e BE-së.

Shërimi i plagëve të së kaluarës, thanë ata, kërkon guxim, angazhim të vërtetë dhe përkushtim ndaj pajtimit.

Bashkimi Evropian mbetet i përkushtuar fuqimisht ndaj të ardhmes evropiane të Bosnjës dhe Hercegovinës si një shtet sovran, i bashkuar, shumëetnik dhe demokratik, përfunduan Kallas dhe Kos.

The GeoPost