Sondazhi i NSPM: Opozita dhe studentët në avantazh, SNS bie në 35 për qind

Hulumtimi i ri i opinionit publik i realizuar nga (NSPM) tregon atë që pushteti po përpiqet ta fshehë prej muajsh – mbështetja për SNS-në ka stagnuar, ndërsa blloku opozitar, përfshirë listën e përbashkët të studentëve dhe opozitës, ndodhet në avantazh.

Sipas rezultateve të anketës telefonike të zhvilluar në dhjetor, në një mostër prej 1.500 të anketuarish (pa Kosovën), për pushtetin aktual do të votonin 35 për qind e qytetarëve.

Në anën tjetër, lista e përbashkët e studentëve dhe opozitës merr 41 për qind mbështetje. Madje 23,5 për qind e të anketuarve janë të pavendosur – çka përbën një potencial serioz për rënie të mëtejshme të rejtingut të regjimit.

Studiuesit konstatojnë se prej një kohe nuk ka lëvizje të mëdha në raportin e forcave midis bllokut qeverisës dhe atij antiregjim. Megjithatë, shifrat flasin qartë – pavarësisht dominimit mediatik dhe presioneve, SNS nuk arrin të kalojë as 35 për qind të mbështetjes.

Hulumtimi ka përfshirë edhe qëndrimet e qytetarëve për politikën e jashtme.

Sa i përket Bashkimit Evropian, 30,4 për qind e të anketuarve e mbështesin plotësisht anëtarësimin e Serbisë në BE, ndërsa 28,8 për qind e kundërshtojnë plotësisht. Kur përfshihen edhe ata që “kryesisht e mbështesin”, mbështetja totale për anëtarësim rritet në 47,1 për qind, ndërsa kundërshtarët “e fortë” dhe “të butë” përbëjnë 42,9 për qind. Me fjalë të tjera, pavarësisht politikës së jashtme të paqartë shumëvjeçare të pushtetit që balanson mes Brukselit dhe Moskës, shumica relative e qytetarëve ende e sheh të ardhmen në BE.

Anëtarësimin e Serbisë në NATO e mbështesin vetëm rreth dhjetë për qind e të anketuarve, ndërsa 84 për qind e kundërshtojnë.

Një raport i ngjashëm vërehet edhe lidhur me vendosjen eventuale të sanksioneve ndaj Rusisë – vetëm 10,7 për qind janë pro, ndërsa 79 për qind kundër.

Interesante është se Rusia, me 24,5 për qind, vazhdon të jetë në vendin e parë sa i përket perceptimit si “vendi më i afërt”, përpara Hungarisë, Gjermanisë dhe Kinës. Megjithatë, studiuesit vërejnë rënie krahasuar me periudhat e mëparshme, kur ky përqindje kalonte mbi 30 për qind.

Hulumtimi tregon se SNS nuk ka shumicë, opozita ka epërsi, ndërsa pothuajse një e katërta e votuesve është në pritje të një alternative.

/The Geopost/