Vuçiq takon Sørensen në Beograd, rikthen retorikën e vjetër të “rrezikut për serbët” në Kosovë

Presidenti i Serbisë, Aleksandar Vuçiq, u takua në Beograd me përfaqësuesin e posaçëm të Bashkimi Evropian për dialogun Beograd–Prishtinë, Peter Sørensen, duke vijuar praktikën e njohur të paraqitjes së situatës në Kosovë përmes narrativës së “rrezikut për mbijetesën e serbëve”.

Pas takimit, Vuçiq njoftoi përmes një postimi në profilin e tij zyrtar në Instagram se fokusi i bisedës ishte vazhdimi i dialogut ndërmjet Beogradit dhe Prishtinës, me atë që ai e quajti “angazhim më aktiv të BE-së”.

Megjithatë, presidenti serb edhe kësaj radhe përdori një retorikë alarmante, duke pretenduar se veprimet e autoriteteve në Prishtinë përbëjnë “vendime eskaluese dhe thellësisht diskriminuese”, të cilat, sipas tij, kërcënojnë drejtpërdrejt komunitetin serb në Kosovë.

Vuçiq paralajmëroi se disa vendime që Prishtina mund të fillojë t’i zbatojë nga 15 marsi mund të kenë “pasoja serioze” për serbët në Kosovë.

Megjithatë, në deklarimet e tij publike nuk janë dhënë detaje konkrete mbi masat në fjalë, as nuk është shpjeguar se në çfarë mënyre ato do të çonin, ligjërisht apo institucionalisht, në atë që ai e përshkruan si “kërcënim të mbijetesës” së komunitetit serb.

Në të njëjtën kohë, kryeministri i Kosovës, Albin Kurti, një ditë më parë kishte zhvilluar gjithashtu një takim me përfaqësues ndërkombëtarë, gjatë të cilit, sipas burimeve zyrtare, u theksua se partnerët ndërkombëtarë tashmë janë të njohur me përmbajtjen dhe zbatimin e Ligjit për të Huajt.

Zyrtarë të Bashkimit Evropian kanë deklaruar më herët se mbështesin përpjekjet e institucioneve të Kosovës për të siguruar që të gjithë personat që jetojnë në Kosovë të regjistrohen në mënyrë të rregullt, në përputhje me ligjet e Kosovës.

Sipas BE-së, qëllimi i këtyre masave është që personat me status “të huaj” të jenë të informuar qartë për të drejtat dhe detyrimet e tyre përpara zbatimit të plotë të Ligjit për të Huajt.

Po ashtu, nga Brukseli është theksuar se veprimet e ndërmarra nga Kosova janë brenda kornizës ligjore ekzistuese dhe në përputhje me standardet evropiane, duke mohuar pretendimet se bëhet fjalë për masa diskriminuese apo eskaluese.

The Geopost