Aktivistja ruse lë një shënim vetëvrasjeje duke fajësuar Putinin për vdekjen e saj

Aktivistja ruse e të drejtave të njeriut dhe disidentja e njohur Nina Litvinova është gjetur e vdekur, në atë që mediat ruse e kanë raportuar si vetëvrasje, ndërsa një mesazh i publikuar nga familjarët e saj ka shkaktuar reagime të forta politike dhe publike.

Sipas raportimeve, kushërira e saj, gazetarja Maria Slonim, ka bërë të ditur në rrjete sociale një fragment të mesazhit të Litvinovës, në të cilin ajo i referohej gjendjes së saj personale dhe situatës politike në Rusi, duke fajësuar presidentin rus Vladimir Putin për klimën e represionit dhe luftën në Ukrainë.

Në mesazh, Litvinova shprehej se jeta për të ishte bërë “e padurueshme” për shkak të, siç shkruhej, burgosjeve të kundërshtarëve të luftës dhe shtypjes së aktivistëve brenda vendit.

Ajo përmendte gjithashtu disa figura të njohura të konsideruara si të burgosur politikë në Rusi, duke theksuar ndjenjën e pafuqisë për të ndihmuar.

“Që nga pushtimi i Ukrainës, njerëzit po vuajnë dhe po vdesin në burgje vetëm sepse kundërshtojnë luftën”, thuhej në fragmentin e mesazhit të publikuar nga familjarët.

Organizata ruse për të drejtat e njeriut Memorial kishte njoftuar më herët për vdekjen e saj dhe e kishte cilësuar Litvinovën si një figurë të angazhuar prej dekadash në mbrojtjen e të burgosurve politikë në Rusi, përfshirë edhe gjatë periudhës sovjetike.

Ajo njihej për përfshirjen e saj në mbështetjen e aktivistëve dhe të burgosurve politikë, si dhe për pjesëmarrjen në procese gjyqësore të figurave të njohura të opozitës ruse.

Vdekja e saj ka rikthyer vëmendjen te gjendja e të drejtave të njeriut dhe shtypja politike në Rusi, sidomos pas fillimit të luftës në Ukrainë.

The Geopost