Në valën e kritikave ndaj nacionalistit Dodik nga BE e SHBA, Vuçiq paralajmëron një takim koordinues me të

I sanksionuari i SHBA-së, nacionalisti serb Milorad Dodik, së fundi është përballur me shumë kritika për veprimet antiperëndimore në Bosnjë e Hercegovinë si president i entitetit serb të Bosnje-Hercegovinës.

Në këtë valë kritikash, presidenti serb Aleksandar Vuçiq, është koordinuar me Dodikun për një takim të përbashkët me të takim i të gjitha “autoriteteve shtetërore” të Serbisë dhe Republikës Srpska.

Vuçiq tha se pati një takim me Dodikun për të diskutuar për situatën aktuale në vend, përkundër që çdon ditë e më shumë Dodik po shihet si faktor destabilizues i rajonit për shkak të kërcënimeve për ndarje dhe retoriken ekstremiste.

“Diskutova me Presidentin Milorad Dodik për situatën në rajon, takimet e ardhshme të rëndësishme të delegacioneve të Republikës së Serbisë dhe Republikës Srpska. Unë e dëgjova Presidentin Dodik me vëmendje të veçantë për të gjitha ngjarjet në RS dhe Bosnje-Hercegovinë dhe ramë dakord që të organizojmë sa më parë një takim të të gjitha organeve shtetërore të Serbisë, në territorin e Republikës Srpska”, tha Vuçiq në Instagram, duke treguar më pas se përveçse me Dodik, u koordinua edhe me Patriarkun Porfirije.

Së fundi, Qeveria e Republikës Sërpska ka miratuar ligje për moszbatimin e vendimeve të Gjykatës Kushtetuese të Bosnjës dhe që të mos i publikojë vendimet e Përfaqësuesit të Lartë të bashkësisë ndërkombëtare.

Për veprimet nacionaliste e destabilizuese e ka kritikuar ashpër Dodikun edhe Përfaqësuesi i Lartë i BE-së, Josep Borrell.

“Akti i largimit prej rendit kushtetues duhet të ndalet. Retorika përçarëse, kërcënimet për ndarje, kërcënimet ndaj integritetit territorial dhe madhërimi i kriminelëve të luftës duhet të ndalet, sepse nuk ka vend për diçka të tillë në Evropë”, ka thënë Borrelli në takimin e pestë të Këshillit për Stabilizim-Asociim, Bosnje-BE.

Shqetësimet për Dodikun i ka ngritur edhe i dërguar i SHBA-së për Ballkanin, Gabriel Escobar, në një dëshmi të dhënë para anëtarëve të Komitetit të Dhomës së Përfaqësuesve për Marrëdhënie me Jashtë, më 18 korrik.

“Veprimet e vazhdueshme, përçarëse dhe jodemokratike kërcënojnë stabilitetin, sigurinë dhe prosperitetin e shtetit dhe gjithë rajonit”, ka thënë ai.

Këto shqetësime të zyrtarëve evropianë e amerikanë nuk i ka komentuar Vuçiq, me të cilin Dodik mban takime të shpeshta për politikat përçarëse që ndërmerr në Republikën Srpska.

Dodik është një përkrahës i madh i Kremlinit dhe luftës agresive që ka nisur në Ukrainë.

Vitin e kaluar Ministria e Financave e SHBA-së njoftoi se ka vendosur sanksionone ndaj liderit të serbëve të Bosnjës Milorad Dodik. Dodik është sundimtar i Republika Srpska, entitetit serb në Bosnje.

Pas këtyre ndëshkimeve, Dodiku ka thënë se çdo sanksion i afron serbët e Bosnjës me “miqtë e vërtetë” si Rusia dhe Kina.

Edhe ndaj BE-së është rritur presioni që ta sanksionojnë nacionalistin Dodik.

Parlamenti Evropian ka kërkuar vendosjen e sanksioneve kundër Dodikut në vazhdimësi, por nuk janë ndërmarrë veprime deri më tani.