Moskë–Beograd në ofensivë kundër autokefalisë së Kishës Ortodokse malazeze

Shërbimi i Jashtëm i Inteligjencës së Federatës Ruse (SVR) ka reaguar ndaj njoftimeve se Patriku Ekumenik i Kostandinopojës, Bartolomeu, po planifikon t’i japë autokefalinë Kishës Ortodokse të Malit të Zi (KOMZ).

Në një deklaratë zyrtare, SVR e akuzoi Patrikun Bartolomeu për “veprimtari përçarëse”, duke pretenduar se ky hap përbën një “goditje ndaj Kishës Ortodokse Serbe” (KOS). Shërbimi rus shkoi edhe më tej, duke përfshirë në këto akuza edhe shërbimet e inteligjencës britanike, të cilat i cilësoi si faktorë nxitës të procesit.

Reagimi i Moskës shihet si një përpjekje e radhës për ta paraqitur çdo iniciativë autonome kishtare në Mal të Zi si “intrigë të jashtme”, me qëllim diskreditimin e pavarësisë fetare që nuk është nën ndikimin rus në botën ortodokse.

Përmes kësaj retorike, autoritetet ruse synojnë gjithashtu të rrisin tensionet ndërmjet Malit të Zi dhe Serbisë, duke i etiketuar malazezët si “përçarës”, ndërsa Kishën Ortodokse Serbe duke e paraqitur si palë të dëmtuar.

Sipas analistëve, Moska po përdor Kishën Ortodokse Serbe dhe narrativën propagandistike për të penguar forcimin e pavarësisë dhe autonomisë së Malit të Zi në planin fetar, ndërkohë që synon të diskreditojë çdo ndikim evropian në rajon.

Nga ana tjetër, autokefalia e Kishës Ortodokse të Malit të Zi vlerësohet si një hap drejt çlirimit të vendit nga presionet politike dhe kishtare që vijnë nga Beogradi dhe Moska, një zhvillim që nuk i shkon për shtat as Kishës Ortodokse Serbe dhe as Federatës Ruse./TheGeoPost.