Vuçiq mungon në samitin evropian, por thellon kontaktet me Moskën – fokus në energji dhe mesazh për Putinin

Presidenti i Serbisë, Aleksandar Vuçiq, ka zgjedhur të mos marrë pjesë në Samitin e Komunitetit Politik Evropian në Jerevan, një ngjarje ku u mblodhën liderë nga 48 vende evropiane nën sloganin “Ndërtimi i së ardhmes: Unitet dhe stabilitet në Evropë”.

Mungesa e tij në këtë takim vjen në një kohë kur, sipas vlerësimeve politike, vërehet një distancim gradual i Beogradit nga disa aktivitete të Bashkimit Evropian, ndonëse autoritetet serbe nuk kanë deklaruar zyrtarisht një ndryshim kursi ndaj Brukselit.

Në të njëjtën kohë, Vuçiq ka vijuar kontaktet e rregullta me përfaqësues të Rusisë.

Sot ai është takuar në Beograd me ambasadorin rus Alexander Bocan-Harçenko, ku është diskutuar furnizimi i qëndrueshëm me energji dhe veçanërisht gazi natyror nga Rusia.

Gjatë takimit, presidenti serb ka theksuar rëndësinë e një politike “të përgjegjshme energjetike”, duke nënvizuar se bashkëpunimi me Moskën mbetet i rëndësishëm për sigurinë energjetike të vendit.

Po ashtu, Vuçiq i ka dorëzuar ambasadorit një letër me kërkesën që t’i përcillet presidentit rus Vladimir Putin, me rastin e Ditës së Fitores më 9 maj. Ai e ka cilësuar këtë datë si “një nga më të rëndësishmet në historinë e njerëzimit”, duke theksuar se ajo simbolizon heroizmin dhe rezistencën.

Në deklaratat e tij, presidenti serb ka riafirmuar gjithashtu qëndrimin se Serbia nuk do të lejojë “rishikimin e historisë” dhe ka theksuar rolin e Ushtrisë së Kuqe në çlirimin e Serbisë dhe Evropës gjatë Luftës së Dytë Botërore, duke vijuar një narrativë të njohur pro-ruse në diskursin zyrtar të Beogradit.

The Geopost

 

View this post on Instagram

 

A post shared by Aleksandar Vučić (@buducnostsrbijeav)