Krimet e “turizmit të snajperëve” në Sarajevë: Kurti përmend Vuçiqin dhe kërkon hetim ndërkombëtar

Kryeministri i Kosovës, Albin Kurti, ka kërkuar themelimin e një gjykate speciale ndërkombëtare për të hetuar dhe gjykuar krimet e njohura si “turizmi i snajperëve” në Sarajevë, duke deklaruar se në këtë fenomen thuhet të ketë pasur rol edhe presidenti i Serbisë, Aleksandar Vuçiq.

Deklaratat Kurti i bëri gjatë konferencës së dytë shkencore ndërkombëtare të Institutit të Krimeve të Kryera gjatë Luftës në Kosovë, e cila u mbajt në shenjë të 18-vjetorit të Pavarësisë së Kosovës.

Ai ka theksuar se sipas informacionit që qarkullon, gjatë rrethimit të Sarajevës në fillim të viteve ’90, persona të ndryshëm paguanin shuma parash për të qëlluar me snajper civilë boshnjakë nga kodrat përreth qytetit.

“Shtëpi të verdhë nuk ka, por ka gjithnjë e më shumë informacione dhe fakte se ka pasur ‘Sarajevo safari’, ku rol thuhet të ketë pasur presidenti i Serbisë, Aleksandar Vuçiq. Për një shumë të hollash, nga kodrat përreth Sarajevës mund të qëlloje boshnjakë civilë me snajper në qytetin e rrethuar. Për të hetuar dhe gjykuar krimet e ‘Sarajevo safari’ do të duhej të angazhohej ndonjë gjykatë speciale ndërkombëtare”, ka thënë Kurti.

Kryeministri shtoi se e ashtuquajtura “shtëpia e verdhë” për trafikim organesh në Shqipëri, sipas tij, nuk ka ekzistuar kurrë dhe e cilësoi atë si pjesë të një narrative hibride kundër Ushtrisë Çlirimtare të Kosovës dhe Shqipërisë.

Duke folur për ish-krerët e UÇK-së që aktualisht po gjykohen në Hagë, Kurti theksoi se lufta e UÇK-së ishte e drejtë dhe e domosdoshme për liri dhe mbijetesë.

Ai e cilësoi konfliktin si një përgjigje ndaj një regjimi shtypës dhe represioni sistematik ndaj shqiptarëve të Kosovës gjatë viteve të 1990-ës.

Në të njëjtën konferencë, drejtori ekzekutiv i Institutit të Krimeve të Kryera gjatë Luftës në Kosovë, Atdhe Hetemi, ka theksuar se ky organizim synon të thellojë dialogun shkencor dhe të zgjerojë perspektivën mbi hulumtimet e krimeve të luftës.

Hetemi tha se përmes konferencave të tilla ofrohen analiza të thelluara dhe qasje ndërdisiplinare për pasojat afatgjata të luftës, duke kontribuar në dokumentimin dhe mirëkuptimin e historisë së konfliktit në rajon.

Konferenca shkencore, sipas organizatorëve, shërben si një platformë për studiues, historianë dhe profesionistë të drejtësisë për të diskutuar dëshmitë, krimet e luftës dhe implikimet e tyre historike dhe ligjore, duke synuar të forcojë njohuritë për proceset e drejtësisë dhe kujtesën historike në rajon.

The Geopost