Ushtari rus vret katër persona në një sulm me armë në Krimenë e pushtuar

Katër persona kanë humbur jetën pasi një ushtar i forcave të armatosura ruse hapi zjarr në një sulm të armatosur në Krimenë e pushtuar nga Rusia.

Guvernatori i emëruar nga Moska në Sevastopol, Mikhail Razvozhayev, tha se ushtari fillimisht qëlloi ndaj kolegëve të tij ushtarakë, duke vrarë një ushtar dhe plagosur një tjetër.

Më pas, ai shkoi në fshatin Khmelnytske, ku vrau tre civilë – dy burra të moshës 71 dhe 59 vjeç, si dhe një grua 64-vjeçare. Tre persona të tjerë mbetën të plagosur.

Sipas Razvozhayevit, autori i sulmit është arrestuar, ndërsa motivet e ngjarjes janë ende nën hetim.

Autoritetet nuk e kanë bërë publik identitetin e tij dhe nuk kanë dhënë informacione se në cilën degë të forcave të armatosura ruse shërbente.

Nuk është e qartë nëse numri i viktimave mund të rritet. Guvernatori tha se mjekët po bëjnë “gjithçka është e mundur” për të shpëtuar të plagosurit.

Ai gjithashtu u bëri thirrje qytetarëve të mbështeten vetëm në informacionet zyrtare dhe të mos përhapin “thashetheme të paverifikuara” lidhur me motivet e sulmit apo identitetin e autorit.

Rusia mori nën kontroll Gadishullin e Krimesë në vitin 2014, pas aneksimit të tij nga Ukraina.

Megjithatë, shumica dërrmuese e komunitetit ndërkombëtar nuk e njeh aneksimin e Krimesë dhe e konsideron atë territor të pushtuar të Ukrainës.

Rusia mban një prani të konsiderueshme ushtarake në Krime, e cila ka qenë vazhdimisht objekt i sulmeve me dronë dhe raketa nga Ukraina.

/The Geopost/