Nga Rusia te Kina dhe Koreja e Veriut, kush fshihet pas sulmeve dhe sabotimeve që po tronditin Evropën?

Nëse pas sulmeve të fundit kibernetike dhe alarmeve për bomba, të cilat kanë shkaktuar kaos në hapësirën ajrore evropiane, fshihet Rusia, gjurmët mund të çojnë drejt Qendrës Kryesore për Teknologjitë Speciale të GRU-së, i vetmi shërbim i inteligjencës së Moskës që i mbijetoi fundit të epokës sovjetike dhe që është i ngarkuar me operacionet jashtë vendit.

Ky ekip njihet më së shumti si Njësia 74455 dhe është bërë i famshëm për sulmet shkatërruese ndaj disa kompanive në Evropë, të cilat shkaktuan humbje të mëdha financiare. Sulmet u kryen në qershor të vitit 2017, duke përdorur programe ransomware të njohura si “NotPetya” ose “EternalPetya”.

Njësia akuzohet gjithashtu për sabotimin e rrjetit elektrik të Ukrainës gjatë dimrave të viteve 2015 dhe 2016, si dhe për mbështetjen e katër agjentëve sekretë, të akuzuar për një tentativë sulmi ndaj Organizatës për Ndalimin e Armëve Kimike në Hagë.

E njohur edhe me emrin e koduar “Sandworm”, të marrë nga romani “Dune” i shkrimtarit Frank Herbert, kjo njësi mori përsipër sabotimin e ceremonisë së hapjes së Lojërave Olimpike Dimërore në PyeongChang, në shkurt të vitit 2018, duke u përpjekur të fajësonte Korenë e Veriut.

Pikërisht në Phenian ndodhet edhe emri i dytë në listën e të dyshuarve të mundshëm për fushatën e veprimeve destabilizuese që kanë goditur vendet evropiane: grupi kriminal kibernetik Lazarus Group, i njohur gjithashtu si Hidden Cobra ose me emrin e koduar APT38 (Advanced Persistent Threat 38).

Ky grup është përfshirë në një sërë sulmesh të rënda në mbarë botën, përfshirë përmes programit keqdashës WannaCry. Atij i atribuohen gjithashtu vjedhja e 81 milionë dollarëve nga llogaria e një banke në Bangladesh, një tentativë për të tërhequr para nga banka vietnameze Tien Phong Bank, si dhe sulmi kibernetik ndaj kompanisë Sony Pictures në vitin 2014. Ky i fundit synonte të pengonte publikimin e komedisë satirike “The Interview”, që kishte në qendër udhëheqësin e Koresë së Veriut, Kim Jong-un.

Së fundmi, sipas FBI-së, grupi mund të jetë përgjegjës edhe për një nga vjedhjet më të mëdha të kriptomonedhave në histori, atë ndaj platformës Binance, me një vlerë që tejkalon 6 miliardë dollarë.

Një tjetër shtet që përmendet është Kina, ku disa kompani akuzohen se kanë mbështetur sulme kibernetike, si operacioni “Cloud Hopper”, me synimin për të vjedhur të dhëna me rëndësi tregtare nga kompani shumëkombëshe në mbarë botën.

Pekini disponon gjithashtu ushtrinë më të madhe dhe më të zhvilluar kibernetike në botë, e cila konsiderohet përgjegjëse për mijëra sulme ndaj faqeve të internetit dhe bazave të të dhënave. A2CNN.