Gati dy dekada në pushtet, Orban në rënie të lirë

Pothuajse dy dekada pasi mori pushtetin për herë të parë, kryeministri hungarez Viktor Orbán po përballet me sfidën më serioze politike të karrierës së tij.

Rënie e vazhdueshme e vlerësimeve, një kundërshtar i fortë që jo vetëm e arrin, por edhe e tejkalon në sondazhe, si dhe zëra gjithnjë e më të shpeshtë brenda vetë Fidesz-it për një ndryshim të mundshëm në udhëheqje, po e tronditin dominimin afatgjatë të Orbán-it në skenën politike hungareze.

Sondazhet më të fundit të opinionit publik nga janari 2026 tregojnë se balancat politike në Hungari po ndryshojnë me shpejtësi.

Një anketë e realizuar nga agjencia kërkimore Zavec, mbi një mostër përfaqësuese prej 1,000 qytetarësh të anketuar mes 19 dhe 24 janarit, dhe e publikuar nga portali i pavarur Telek, tregon se partia opozitare Tisa, e udhëhequr nga Péter Magyar, gëzon 49 për qind të mbështetjes së votuesve, ndërsa Fidesz i Orbán-it ndalet në 39 për qind.

Sipas këtij sondazhi, Tisa është profilizuar qartë si alternativa kryesore ndaj pushtetit aktual, duke shënuar mobilizim të fortë sidomos te votuesit e rinj dhe ata që jetojnë në zonat urbane.

Veçanërisht domethënës është fakti se Tisa gëzon dyfish më shumë mbështetje në Budapest dhe ndër votuesit me arsim të lartë, ndërsa Fidesz vazhdon ta ruajë bazën e saj kryesisht te votuesit mbi moshën 60 vjeç.

Rezultate të ngjashme nxjerr edhe hulumtimi i agjencisë Median, i publikuar nga HVG dhe i analizuar në detaje nga portali 24.hu. Sipas këtyre të dhënave, epërsia e Tisa-s ndaj Fidesz-it është rritur edhe më shumë mes të ashtuquajturve “votues të sigurt”.

Nëse dy muaj më parë diferenca mes dy blloqeve politike ishte rreth 10 pikë përqindjeje, në janar ajo u zgjerua në 12 pikë në favor të opozitës. Shifrat konkrete ilustrojnë qartë përmasat e sfidës me të cilën përballet Orbán: mes votuesve që tashmë e dinë se për kë do të votojnë, Tisa ka 51 për qind mbështetje, ndërsa Fidesz 39 për qind; mes votuesve të pavendosur, Tisa qëndron në 49 për qind, ndërsa Fidesz në 41 për qind; në popullsinë e përgjithshme, Tisa mbledh 40 për qind të mbështetjes, ndërsa Fidesz vetëm 33 për qind.

Anketa e Median u zhvillua mes 7 dhe 13 janarit përmes intervistave telefonike, me një marzh gabimi deri në ±3.5 për qind.

Siç raporton Daily News Hungary, edhe fushata intensive e qeverisë – e cila përfshiu stimuj financiarë, pensione shtesë, lehtësime tatimore dhe masa të tjera që kritikët i cilësojnë si ekonomikisht të paqëndrueshme – nuk arriti të rikthejë besimin e humbur të elektoratit.

Sondazhet e pavarura tregojnë se prej muajsh Tisa ka rreth 400 mijë vota potenciale më shumë se Fidesz, një hendek që, sipas analistëve, nuk mund të neutralizohet lehtë as nga sistemi zgjedhor hungarez, i cili tradicionalisht favorizon zonat rurale.

Të dhënat e fundit sugjerojnë se Hungaria po hyn në një fazë të re politike, ku për herë të parë pas shumë vitesh, pushteti i Viktor Orbán-it nuk duket më i pathyeshëm.

The Geo Post