Si u implikua ish-emisari i BE-së për dialogun Kosovë – Serbi në dosjen e Jeffrey Epstein?

Dokumente të reja të publikuara nga Departamenti i Drejtësisë i Shteteve të Bashkuara kanë rikthyer në vëmendje komunikimet e ish-ministrit të Jashtëm të Sllovakisë, Miroslav Lajçak, me pedofilin Jeffrey Epstein, duke ngritur pikëpyetje serioze mbi natyrën e marrëdhënies së tyre.

Miroslav Lajçak, ishte Emisar i Bashkimit Evropian, në dialogun Kosovë-Serbi. Ai me 31 janar 2025 përfundoi mandatin e tij pesë vjeçar.

Sipas mediave sllovake, në vitin 2018 Lajçak i kishte dërguar Epsteinit një mesazh nga Kievi, ku shkruante: “Përshëndetje nga Kievi. Thjesht dua ta konfirmoj se vajzat janë të mrekullueshme si gjithmonë”.

Pak më vonë, ai i dërgoi edhe një tjetër “përshëndetje nga Kievi”, të shoqëruar me një fotografi, e cila sipas raportimeve ishte e censuruar.

Ky komunikim është pjesë e mbi tre milion faqeve dokumentesh që lidhen me hetimin ndaj Jeffrey Epstein, të cilat u bënë publike të premten e kaluar nga autoritetet amerikane.

Mediat në Sllovaki raportojnë se emri i Lajçakut shfaqet plot 346 herë në këto dokumente. Ndërkohë, sipas portalit Politico, emri “Miro” – siç e thërriste shpesh Epstein Lajçakun – figuron mbi 700 herë në materialet e publikuara.

Dokumentet zbulojnë një seri takimesh mes Lajçakut dhe Epsteinit, si dhe biseda miqësore që përmbajnë referenca të përsëritura për “vajzat”. Këto zbulime bien ndesh me qëndrimet e mëhershme mbrojtëse të zyrtarëve sllovakë.

Në nëntor të vitit të kaluar, kur u publikua pjesa e parë e komunikimeve mes dyshes, këshilltari i kryeministrit sllovak, Robert Fico, doli në mbrojtje të Lajçakut, duke deklaruar se kontaktet me Epsteinin kishin qenë thjesht shoqërore dhe në kuadër të detyrave diplomatike. Megjithatë, dokumentet e reja sugjerojnë se komunikimi mes tyre ka qenë shumë më intensiv dhe me tone dukshëm miqësore.

Nga shtatori i vitit 2017 për një periudhë njëvjeçare, Miroslav Lajçak shërbeu si kryetar i Asamblesë së Përgjithshme të Kombeve të Bashkuara, rol që e mbajti për një kohë të gjatë në New York, qytet ku Epstein ishte gjithashtu aktiv.

Ish-ministri i Jashtëm i Sllovakisë, i cili më vonë shërbeu edhe si i deleguar i Bashkimit Evropian për dialogun Kosovë–Serbi, ka mohuar vazhdimisht dhe me vendosmëri se ka pasur komunikime me Epsteinin lidhur me vajza.

Megjithatë, dokumentet e reja tregojnë se gjatë një vizite zyrtare në Ukrainë, ku Lajçak po merrte pjesë në një takim në Kiev me ish-presidentin ukrainas Petro Poroshenko dhe zyrtarë të tjerë të lartë qeveritarë, ai i dërgoi Epsteinit mesazhin në të cilin shkruante se “vajzat këtu janë të mrekullueshme”.

Në komunikime të tjera, Lajçak i dërgoi Epsteinit një fotografi nga Moska, e cila sipas dokumenteve ishte e censuruar. Epstein iu përgjigj duke thënë se do të preferonte “një pamje nga brenda”. Lajçak më pas i shkroi se “vajzat janë të jashtëzakonshme”, ndërsa Epstein vazhdoi bisedën duke i cilësuar ato si “eksporti më i mirë rus”.

Në një tjetër shkëmbim mesazhesh, Lajçak i shkruan Epsteinit se në atë moment nuk kishte asnjë vajzë me vete. Epstein i përgjigjet se ai ishte në shoqërinë e dy vajzave, gjë që sipas dokumenteve Lajçakut i dukej “padrejtësi”.

“Por unë nuk do të jem president”, i shkruan më tej Epstein, në një bisedë që dokumentet e reja e paraqesin si pjesë të një komunikimi të gjatë dhe të afërt mes dy burrave.

Kryeministri sllovak Robert Fico pranoi dorëheqjen e këshilltarit të tij Miroslav Lajçak, pasi emri i tij u shfaq në dokumente që lidhen me pedofilin Jeffrey Epstein.

Lajçak kishte ofruar më parë dorëheqjen e tij, dhe Fico e pranoi atë, megjithëse këshilltari i tij i hodhi poshtë akuzat nga dokumentet.

Duke komentuar informacionin rreth emrit të Lajçakut në dokumentet e Epsteinit, Fico deklaroi: “Nuk kam parë kaq shumë hipokrizi për një kohë të gjatë.”

The Geo Post