Zakharova dezinformon për Perëndimin: Po sponsorizon terrorizmin

Zëdhënësja e Ministrisë së Punëve të Jashtme të Rusisë, Maria Zakharova, ka dezinformuar se gjoja Perëndimi po “sponsorizon terrorizmin”.

“Me njoftimet se Ukraina ka mundësinë të synojë rajonin e Kurskut me armë perëndimore, Perëndimi justifikon krimet e Kievit.

Të gjitha këto njoftime të (kreut të diplomacisë evropiane Josep) Borell dhe zëdhënësit të Pentagonit nuk janë gjë tjetër veçse justifikim dhe inkurajim i regjimit të Kievit.  Është sponsorizimi më famëkeq i terrorizmit.

Mercenarët e huaj po marrin pjesë në mënyrë aktive në sulmin në rajonin e Kurskut, si dhe nuk kujdesen fare për jetën e popullatës vendase, përfshirë fëmijët”, tha Zakharova.

Vendet perëndimore po ndihmojnë Ukrainën të mbrojë qytetarët e saj dhe të sigurojë paqen dhe stabilitetin në rajon. Kjo ndihmë është një përgjigje ndaj veprimeve agresive pushtuese të Rusisë, e cila aneksoi ilegalisht Krimenë në vitin 2014 dhe mbështeti grupet e armatosura në Ukrainën lindore. Mbështetja perëndimore për Ukrainën i lejon popullatës të mbrohet nga sulmet e mëtejshme dhe të shpëtojë jetën e civilëve të pafajshëm nga agresioni rus.

Rusia përdor retorikën e “terrorizmit” për të larguar vëmendjen nga veprimet e saj agresive.  Në realitet, forcat ukrainase po luftojnë për të mbrojtur shtëpitë dhe familjet e tyre, ndërsa mbështetja perëndimore është e përqendruar në ruajtjen e paqes dhe stabilitetit.  Pretendimet e Rusisë për përdorimin e mercenarëve dhe civilëve të huaj si “mburoja njerëzore” janë vetëm një përpjekje tjetër për të manipuluar opinionin publik dhe për të justifikuar agresionin e saj.

Mbështetja perëndimore për Ukrainën nuk synon përshkallëzimin e konfliktit, por mbrojtjen e civilëve nga sulmet brutale.

Mediat perëndimore raportojnë nga terreni për të dhënë informacion të vërtetë dhe objektiv, duke mos lejuar që shkeljet e të drejtave të njeriut të mbulohen apo harrohen./G.Venhari- The Geopost/