Zakharova dezinformon për sulmin në spitalin e fëmijëve në Kiev: Ndodhi nga mbrojtja ajrore e Ukrainës

Zëdhënësja e Ministrisë së Jashtme të Rusisë, Maria Zakharova, ka dezinformuar se sulmi në spitalin më të madh të fëmijëve në Kiev është shkaktuar nga mbrojtja ajrore e Ukrainës. Ekipet e shpëtimit kanë vazhduar kërkimet edhe të martën në rrënojat e spitalit më të madh të fëmijëve në Ukrainë për më shumë të vdekur dhe të plagosur, një ditë pasi autoritetet ukrainase thanë se një raketë ruse rrafshoi një krah të objektit duke vrarë të paktën 42 njerëz në të gjithë vendin.

Çfarë deklaroi Zakharova?

“Në lidhje me sulmin në spital edhe një herë, siç ka ndodhur shumë herë me mbrojtjen ajrore të Ukrainës, raketat e saj dolën nga kursi dhe goditën ndërtesat e banimit dhe institucionet publike. Kështu ndodhi edhe këtë herë. Është konfirmuar tashmë, duke përfshirë edhe dëshmitarë të shumtë, se një nga raketat e sistemit të mbrojtjes ajrore perëndimore NASAMS ra në një ndërtesë në territorin e Spitalit të Fëmijëve Okhmatdyt në Kiev. Rusia përdor armë precize që goditën objektivat e saj në përgjigje të përpjekjeve të ushtrisë ukrainase për të goditur ndërmarrjet e kompleksit ekonomik rus”, tha Zakharova.

Analiza:

Një spital për fëmijë në Kiev është goditur pasi Rusia nisi një valë sulmesh me raketa kundër qyteteve në të gjithë Ukrainën. Dy persona vdiqën kur Spitali i Fëmijëve Ohmatdyt – objekti më i madh i pediatrisë në Ukrainë – pësoi dëme të mëdha gjatë shpërthimit, ndërkaq 42 njerëz vdiqën në të gjithë vendin nga sulmet ruse.

Ukraina ka konfirmuar se kishte gjetur mbetje të një rakete lundrimi ruse në spital, duke hedhur poshtë pretendimet ruse.

Këtë deklarim të Ukrainës e ka mbështetur edhe një vlerësim i OKB-së që tha se ka shumë gjasa që sulmi në spital të jetë shkaktuar nga një goditje e drejtpërdrejtë nga një raketë ruse.

“Analiza e pamjeve dhe një vlerësim i bërë në vendin e incidentit tregon një probabilitet të lartë që spitali i fëmijëve të ketë pësuar një goditje të drejtpërdrejtë në vend që të dëmtohet për shkak të një sistemi armësh”, tha kreu i misionit të OKB-së për monitorimin e të drejtave të njeriut.

Ndërtesa e goditur e spitalit shërbente për të kryer dializë për fëmijët me dështim të veshkave ose intoksikim akut.

Hetuesit e Gjykatës Penale Ndërkombëtare në Hagë vizituan spitalin të martën për të mbledhur prova për akuza të mundshme për krime lufte, tha gjykata. Spitalet, së bashku me vendet e tjera civile, mbrohen sipas ligjit ndërkombëtar humanitar./TheGeopost/