Ish-gjenerali serb dezinformon mbi bazat e NATO-s

Gjenerali në pension, Milorad Stupar, themelues dhe komandant i parë i Brigadës së 72-të të Operacioneve Speciale të Serbisë, dezinformon se gjoja “kryeministri i Kosovës, Albin Kurti, me mbështetjen e heshtur të Perëndimit, po persekuton serbët” dhe se “ai është i lidhur drejtpërdrejt, me ndërtimin e bazave të NATO-s rreth Serbisë.”

“Duke parë situatën nga pozicioni i Serbisë si një vend ushtarakisht neutral, është e qartë se pozicioni ynë gjeostrategjik përndryshe i vështirë po përkeqësohet me ndërtimin intensiv të bazave të NATO-s në Shqipëri, Bullgari dhe Rumani. Ato nuk janë bërë për ne, por për Rusinë, por në rast të ndonjë përshkallëzimi në Kosovë, sigurisht që do të angazhoheshin kundër vendit tonë, prandaj qeveria Kurti po provokon vazhdimisht konflikte në krahinën jugore me shpresën se NATO do të kthehet sërish kundër Beogradit.”

Deklaratat e ish-gjeneralit serb, Milorad Stupar janë pjesë e një narrative më të gjerë që synon ta portretizojë Serbinë si viktimë të komploteve ndërkombëtare, duke injoruar sfidat dhe problemet reale. Propaganda përgjegjëse për pretendime të tilla është ajo që synon të promovojë NATO-n si një kërcënim dhe burim destabiliteti për Serbinë, pavarësisht faktit se roli i NATO-s në rajon është kryesisht ai i stabilizimit dhe mbrojtjes.

Bazat e NATO-s në Shqipëri, Bullgari dhe Rumani nuk synojnë Serbinë, siç thotë Stupar, por janë pjesë e një strategjie të përgjithshme për të kundërshtuar kërcënimet e mundshme që vijnë nga Rusia. Ato janë rezultat i një marrëveshjeje midis shteteve të pavarura anëtare të NATO-s për të përmirësuar aftësitë mbrojtëse të Aleancës në përputhje me rregullat e së drejtës ndërkombëtare.

Sondazhet e opinionit tregojnë se qytetarët serbë shpesh i japin më shumë rëndësi ndihmës nga Rusia dhe Kina, ndërsa neglizhojnë mbështetjen e BE-së./G.Venhari- The Geopost/