Pas Rusisë e Iranit, Serbia nikoqire e liderit që e rrëzoi udhëheqësin properëndimor në Niger

Kryeministri i Nigerit Ali Mahamane Lamine Zeine, i cili erdhi në pushtet përmes një grusht-shteti pasi hoqi udhëheqësin e zgjedhur të mbështetur nga Perëndimi, Mohamed Bazoum, ka nisur një tur nëpër disa shtetet aleate të tij. Ai e nisi me Rusinë për përforcimin e lidhjeve ushtarake dhe më pas në plan e ka të shkojë edhe në Iran e Serbi, shkruan The Geopost.

Zëvendëskryeministri rus Alexei Overchuk të martën më 16 janar tregoi se Moska është e prirur të zgjerojë lidhjet tregtare, ekonomike dhe të investimeve dhe qarkullimin tregtar me Nigerin, sipas Sputnikut rus.

Overchuk e bëri komentin gjatë takimit që pati me kryeministrin e Nigerit Zeine, i cili ndodhet në kryeqytetin rus si pjesë e një turneu ndërkombëtar që kërkon të identifikojë mundësitë dhe të diversifikojë partnerët e vendit të Afrikës Perëndimore. Zyrtari i lartë rus shpjegoi se për këtë nevojiten hapa të mëtejshëm të përbashkët për të zhvilluar partneritet në fusha të tilla premtuese si bujqësia, energjia, infrastruktura, kërkimet gjeologjike.

Zeine mbërriti në Moskë të hënën vonë më 15 janar, i shoqëruar nga një delegacion i lartë i përbërë nga ministrat e Mbrojtjes, Naftës dhe Gazit, Bujqësisë, Tregtisë, Rinisë dhe Sporteve.
Rusia po shfrytëzon rastin për të rritur bashkëpunimin me liderin që u vendos në pushtet me puç ushtarak dhe i cili nuk ka mbështetje të Perëndimit.

Rusia është pjesa e parë e turneut. Zeine pritet të udhëtojë edhe në Turqi, Iran dhe Serbi.
Lidhjet midis Rusisë dhe Nigerit janë zhvilluar shpejt nën autoritetet e reja të Nigerit, një juntë që mori pushtetin më 26 korrik, pasi hoqi udhëheqësin e zgjedhur të mbështetur nga Perëndimi, Mohamed Bazoum.

Bazoum u rrëzua nga kreu i truprojës presidenciale, gjenerali Abdourahamane Tiani, në një grusht shteti që u dënua nga Ecoëas dhe vendet perëndimore, duke përfshirë ish-fuqinë koloniale Francën.

Fuqitë perëndimore dhe qeveritë demokratike afrikane gjatë gushtit të vitit të kaluar kur nisi grusht-shteti kishin kërkuar që krerët e grushtit të shtetit të rikthejnë në detyrë presidentin e rrëzuar Mohamed Bazoum, të cilin ata e kanë ndaluar që nga 26 korriku, por udhëheqësit ushtarakë kanë refuzuar dhe nuk ishin bindur as në përpjekjet për negociata.

Mohamed Bazoum dhe familja e tij po mbahen nga pushteti i ri në Niger. Muajin e kaluar, gjykata e bllokut rajonal të Afrikës Perëndimore Ecowas vendosi se ndalimi i familjes Bazoum ishte arbitrar. Ajo urdhëroi lirimin e tyre dhe rivendosjen e Bazoum si president.

Junta ushtarake e ka injoruar vendimin dhe ka thënë se do të ketë një tranzicion deri në tre vjet në sundimin civil./The Geopost/