Sllovakia nis vendosjen e sistemit të mbrojtjes ajrore ‘Patriot’

Sistemi i mbrojtjes ajrore Patriot ka filluar të mbërrijë në Sllovaki nga vendet partnere të NATO-s dhe vendosja do të vazhdojë në ditët në vijim, tha të dielën ministri sllovak i mbrojtjes.

Sistemi do të operohet nga trupat gjermane dhe holandeze dhe fillimisht do të vendoset në aeroportin Sliac në Sllovakinë qendrore për të ndihmuar në forcimin e mbrojtjes së krahut lindor të NATO-s, raporton Reuters.

Pushtimi rus i Ukrainës e ka shtyrë aleancën të forcojë mbrojtjen e saj.

Sistemi Patriot do të jetë pjesë e një grupi të ri beteje të NATO-s në Sllovaki, e cila është fqinje me Ukrainën.

“Jam i lumtur të konfirmoj se njësitë e para të ngarkuara me vendosjen e sistemit të mbrojtjes ajrore Patriot po mbërrijnë gradualisht në Sllovaki”, tha ministri i Mbrojtjes Jaroslav Nad në Facebook.

Nad tha se sistemi Patriot do të jetë një plotësues dhe jo një zëvendësim i sistemit S-300 të epokës sovjetike, me të cilin operon Sllovakia.

“Përkohësisht, sistemi do të vendoset në bazën e forcave ajrore Sliac, zonat e mëtejshme të vendosjes janë duke u konsultuar … në mënyrë që ombrella e sigurisë të mbulojë pjesën më të madhe të mundshme të territorit sllovak,” tha Nad.

Ministri tha javën e kaluar se Sllovakia është e gatshme t’i japë Ukrainës S-300 nëse dhe kur ajo merr një zëvendësim të duhur.

Ai përsëriti të dielën se Sllovakia po kërkonte zëvendësimin e saj të S-300 për shkak të vjetërsisë, aftësisë dhe varësisë së saj nga Rusia.

Rusia ka bërë paralajmërime kundër çdo dërgese të mbrojtjes ajrore të avancuar në Ukrainë dhe ka paralajmëruar se mund të shënjestrojë furnizimet me armë perëndimore.