Kryeministrja e Estonisë për CNN: Putini nuk duhet ta fitojë këtë luftë

Putini nuk duhet të fitojë luftën në Ukrainë, tha të dielën për CNN kryeministrja e Estonisë, Kaja Kallas, duke shtuar se është zemërthyese të shikosh se çfarë po bën Putin në Ukrainë.

“Ne po bëjmë gjithçka që mundemi për të mbështetur dhe ndihmuar Ukrainën në këtë luftë. Putini nuk duhet ta fitojë këtë luftë”, tha Kallas.

Kryeministrja tha se qëllimi i NATO-s duhet të jetë përfundimi i luftës duke përdorur “përmbajtje inteligjente” që do të kërkonte kalimin nga parandalimi në një pozicion të sigurt mbrojtjeje. Kjo do të kërkonte bashkëpunim ndërkombëtar për të rritur reciprokisht kapacitetin mbrojtës.

“Ka disa mundësi që janë shumë të shtrenjta për çdo shtet t’i zhvillojë i vetëm, ndërsa trajtimi i tyre së bashku në Evropë mund të na bëjë më të fortë,” tha Kallas.

Premiera vazhdoi duke thënë se izolimi i Rusisë duhet të vazhdojë në të gjitha nivelet e mundshme.

Lidhur me propozimin e Polonisë për vendosjen e një misioni paqeruajtës të NATO-s në Ukrainë, Kallas tha se kjo do të kërkonte fillimisht paqen, ndërkohë që nuk duket të jetë në planet e Rusisë.

“Prandaj, së pari duhet të arrijmë paqen përpara se ta mbajmë atë. Por ndonjëherë nevojitet vullneti për të përdorur forcën ushtarake për të pasur paqe,” tha Kallas.

E pyetur nëse lufta gjithëpërfshirëse në Evropë është një mundësi, Kallas tha se lufta e tretë botërore nuk është në horizont dhe se fokusi i aleatëve duhet të jetë në sigurimin e asaj që lufta të mos përhapet në shtetet e tjera.