SHBA mbështesin përpjekjet për të sjellë para drejtësisë kryesit e gjenocidit të Srebrenicës

Shtetet e Bashkuara mbështesin përpjekjet për të sjellë para drejtësisë kryesit e krimeve të tmerrshme, tha të enjten Daniel Koski, i Ngarkuari me Punë i Ambasadës Amerikane në Bosnje dhe Hercegovinë, përpara 30-vjetorit të gjenocidit të Srebrenicës.
Ai theksoi se SHBA-të mbeten të përkushtuara fort për paqen, pajtimin dhe bashkëjetesën në Bosnje dhe Hercegovinë, për të ndërtuar një të ardhme në të cilën vuajtje të tilla nuk do të përsëriten kurrë.
Ai shprehu respektin e tij më të thellë për viktimat e Srebrenicës dhe për të gjithë ata në Bosnje dhe Hercegovinë dhe në mbarë botën që qëndrojnë me ta.
“Përkujtimi i gjenocidit nuk duhet të jetë vetëm një kujtim i së kaluarës; është gjithashtu një pohim i angazhimit tonë të përbashkët për paqe, empati, dinjitet dhe drejtësi; ai e shndërron tragjedinë në një shkak për shpresë. Shtetet e Bashkuara mbeten të përkushtuara fort për paqen, pajtimin dhe bashkëjetesën në Bosnje dhe Hercegovinë për të ndërtuar një të ardhme në të cilën vuajtje të tilla nuk do të përsëriten kurrë”, tha Koski, ndër të tjera.
Në korrik të vitit 1995, forcat e Ushtrisë së Republikës Srpska vranë rreth 8000 burra dhe djem në dhe përreth Srebrenicës në atë që gjykatat ndërkombëtare dhe vendase e kanë përshkruar si gjenocid.
Më shumë se 50 persona u dënuan me rreth 700 vjet burg për gjenocid dhe krime të tjera në zonën e Srebrenicës.
Deri më tani, 6 665 persona janë varrosur në Qendrën Përkujtimore Srebrenicë-Potoçari, ndërsa afërsisht 250 viktima të gjenocidit janë varrosur në vende të tjera, në përputhje me dëshirat e familjeve të viktimave.
Raporti Special i RFE/RL: Dokumentimi i Gjenocidit në Srebrenicë
“Rruga drejt shërimit është e gjatë, por nuk jeni vetëm. Ne i kujtojmë të vdekurit. Ne nderojmë të gjallët. Dhe ne vazhdojmë angazhimin tonë për një të ardhme të bazuar në paqe dhe njerëzim të përbashkët”, tha Koski, ndër të tjera.
Shumë delegacione kanë njoftuar mbërritjen e tyre për përkujtimin e 30-vjetorit të gjenocidit të Srebrenicës. Një delegacion i nivelit të lartë nga Departamenti i Shtetit i SHBA-së, i udhëhequr nga Brandon Hanrahan, Ndihmës Sekretar i Shtetit në Detyrë për Evropën dhe Euroazinë, ka mbërritur gjithashtu në Bosnjë dhe Hercegovinë.

https://www.slobodnaevropa.org/