Policia e Kosovës mbrëmë ka parandaluar sulmin terrorist në veri të vendit

Policia e Kosovës  mbrëmë ka parandaluar një sulm terrorist në veri të vendit. Një gjë të tillë e ka bërë të ditur ministri i Punëve të Brendshme, Xhelal Sveçla.

Ai ka thënë se “falë angazhimit intenziv të njësiteve të specializuara të Policisë së Kosovës dhe informatave/inteligjencës së pranuar, sot është identifikuar një veturë me targa të Beogradit, rreth 100m larg Komunës së Zveçanit, në të cilën janë zbuluar sasi të mëdha të armatimeve, mjeteve eksplozive dhe municioneve të ndryshme, përfshi Zolla, Osa, eksplozivë, armë automatike, sasi e konsiderueshme e municionit, shok-bomba, uniforma dhe çanta ushtarake”.

Lidhur me këtë situatë Sveçla sot ka mbajtur edhe konferencë për shtyp, ku ka theksuar se “sundimi i ligjit për ne është prioritet, mbi bazën e të cilit po veprohet”, duke shtuar se sovraniteti i Republikës së Kosovës është i paprekshëm.

Ministri Sveçla bëri të ditur se në kuadër të këtij arsenali të armatimit ka shenja që ndërlidhen me, siç tha ai, grupe ilegale si: ‘Brigada e Veriut’, shenja dalluese të njësiteve ruse, radiolidhje të ngjashme me ato të konfiskuara në zyrën e Aleksandar Filipoviqit, (ishg-shef i njësisë së Operativit në Drejtorinë rajionale të veriut, i shpërblyer nga presidenti i Serbisë, Aleksandar Vuçiq), në Leposaviq.

Më tej, ministri Sveçla bëri të ditur se në ditët në vijim nga Qeveria e Kosovës do të kërkojë që organizatat si: “Mbrojtja Civile” e “Severna Brigada” të shpallen organizata terroriste, me çka lufta ndaj kërtyre organizatave do të jetë edhe më efikase./The Geopost/