Top dezinformatat ruso-serbe gjatë javës që lamë pas

Java që lamë pas nisi me dezinformatat e zëdhënëses së Ministrisë së Jashtme ruse Maria Zakharova e cila dezinformoi për atmosferën gjatë zgjedhjeve të Parlamentit Evropian. Ajo deklaroi se “forcat politike që kundërshtojnë konfrontimin me Rusinë i nënshtrohen diskriminimit, presionit dhe ngacmimit”.

Dezinformimi i Zakharovas për zgjedhjet e Parlamentit Evropian dhe pretendimet e saj, të cilat janë pjesë e propagandës më të gjerë ruse, kanë për qëllim destabilizimin e institucioneve evropiane. Pretendimet e saj për kufizime të rënda dhe mungesë të konkurrencës së ndershme nuk mbështeten me prova konkrete. Zgjedhjet evropiane janë të njohura për transparencën dhe standardet e larta demokratike.

Ajo dezinformoi poashtu se “NATO furnizon Kosovën me armë dhe e ndihmon të krijojë ushtrinë e saj”, gjë që, sipas saj, “nuk lejohet nga Rezoluta e Këshillit të Sigurimit të Kombeve të Bashkuara”.

Dezinformata pati edhe për ambasadorin amerikan, Michael Murphy. Ishte presidenti i Republikës Srpska, Milorad Dodik, i cili dezinformoi me pretendimet se Bosnja dhe Hercegovina po shpërbëhet nga ambasadori i SHBA në BiH, Michael Murphy dhe rezoluta e Srebrenicës në Kombet e Bashkuara janë të pasakta dhe pjesë e një fushate më të gjerë propagandistike.

Deklaratat e Dodik për rolin e ambasadorit të SHBA-së në Bosnje dhe Hercegovinë janë pjesë e një fushate më të gjerë propagandistike që synon destabilizimin e marrëdhënieve rajonale. Ambasadori Michael Murphy vepron në përputhje me normat dhe parimet ndërkombëtare dhe mbështet stabilitetin dhe paqen në rajon.

E ministri i Jashtëm rus, Sergei Lavrov ka bërë një akuzë të pabazë dhe të rreme kundër Shteteve të Bashkuara, duke thënë se “SHBA po përpiqet të ruajë hegjemoninë e saj në botë përmes metodave e terrorit të hapur dhe financimit të drejtpërdrejtë të sulmeve terroriste nga regjimi i Kievit kundër civilëve në territorin rus”.

Këto deklarata janë pjesë e një fushate më të gjerë propagandistike ruse të dezinformimit./The Geopost/