Profesori serb dezinformon: Në sheshin e Mitrovicës shqiptarët po ngacmojnë vajzat, gratë dhe të moshuarat serbe

Boris Bratina, profesor nga Fakulteti Filozofik në Mitrovicë, ka dezinformuar se gjoja në sheshin nw Mitrovicw tw Veriut shqiptarët po ngacmojnë gratë, vajzat e të moshuarat serbe. Këtë deklaratë të rrejshme e ka publikuar mediumi serb “Informer” që dezinformoi po ashtu se kryeministri Albin Kurti po dëshiron të ndërrojë strukturën etnike në Mitrovicë të Veriut.

Çka deklaroi Bratina?

“Në Mitrovicë duket sikur shqiptarët janë në një të tretën e asaj shëtitore dhe më pas ata  ngacmojnë mbi gratë, vajzat dhe veçanërisht të moshuarat. Ata sillen shumë paturpësisht. Ekziston një lloj lufte kafenesh. Ata ulen në një kafe dhe ne në një tjetër. Prania e shqiptarëve në veri të Mitrovicës ishte e diktuar. Kurti dëshiron ta bëjë veriun të tillë që të ketë një popullsi shqiptare që do të ishte aty për të bërë hile me popullsinë që do t’i kundërshtonte serbët. Sigurisht që nuk është e mundur. Ata duan të vendosen aty ku nuk e kanë vendin, të marrin diçka për asgjë në kurriz të serbëve”.

Analiza:

Bratina ka dezinformuar për gjoja ngacmime të grave serbe me qëllim të nxitjes se një situate të panikut dhe frikës te populli. Në sheshet e Mitrovicës së Veriut nuk është regjistruar asnjëherë diçka e tillë siç thotë Bratina i cili pa asnjë bazë ka bërë deklaratën.

Aktualisht Policia e Kosovës ka shtuar prezencën në Mitrovicë e Veriut për shkak të sulmit terrorist që ka ndodhur në kanalin e ujit të Ibër Lepencit. Këtë prezencë të shtuar për shkak të rritjes së sigurisë zyrtarë serbë e protagonistë të tjerë po e shfrytëzojnë për të dezinformuar për kinse dhunë të ushtruar ndaj popullit serb.

Shtetet perëndimore i kanë dhënë përkrahje të plotë autoriteteve të Kosovës në zbardhjen e rastit terrorist dhe sjelljen para drejtësisë të autorëve që kryen këtë sulm ndaj një kanali jetik për ujin e pijshëm për disa zona dhe po ashtu për Korporatën Energjetike të Kosovës.

Policia e Kosovës ka kërkuar nga qytetarët serbë të bashkëpunojnë me policinë për këtë rast që ka prekur edhe atë pjesë të vendit dhe iu ka bërë thirrje atyre që të mos shqetësohen nga këto aksione sepse askush nga qytetarët e pafajshëm nuk do të ndiqet.

/The Geopost