Dezinformon eurodeputeti Geadi: Ka përpjekje sistematike për dëbimin dhe vrasjen e serbëve

Eurodeputeti grek-çipriot, Geadis Geadi ka dezinformuar në Parlamentin Evropian gjatë fjalës së tij ku folëse ishte edhe ministrja e Jashtme e Kosovës, Donika Gërvalla, ku foli për sulmin terrorist në Kosovë në infrastrukturë kritike të ujit në Ibër Lepenc. Geadi ka thënë se ka shumë përpjekje që serbët të dëbohen dhe vriten.

Çka deklaroi ai?

“Duke marrë parasysh kam ca dyshime sa i përket kryerësve për shkak që ju keni dënuar Beogradin edhe pse Beogradi ka thënë se është i gatshëm për të identifikuar kryerësit. Serbia nuk ka ndonjë qëllim që të devijojë nga rrugëtimi i BE-së. Do të duhej të kishte një hetim të mirëfilltë. Duke parë që në rajon ka pasur përpjekje sistematike për të ndryshuar demografinë ashtu që serbët të përjashtohen, të vriten dhe në vend të deeaskalimit ajo që po duket se po ndodh është se gjërat po përshkallëzohen tutje. Dhe tash po dëgjojmë për Shqipërinë e Madhe dhe çfarë mendoni për ato trende që nuk çojnë drejt qetësimit të rajonit”.

Analiza:

Narrativa që ka përdorur eurodeputeti Geadi është kopjuar nga Serbia dhe liderët e saj që vazhdimisht thonë se Kosova ka në synim “spastrimin etnik” të serbëve dhe se gjoja ata po persekutohen.

Geadi dezinformon kur thotë se ka përpjekje të për ndryshim të demografisë dhe përjashtim e vrasje të serbëve. Asnjë raport ndërkombëtar nuk e evidenton një shkelje të tillë apo ndonjë tjetër karshi serbëve që jetojnë në Kosovë. Kushtetuta e saj është ndër më të avancuarat në Evropë për mbrojtjen dhe garantimin e të drejtave pavarësisht që janë në përqindje shumë të vogël dhe kjo gjë është parë dhe konstatuar edhe nga raporti i fundit i raportuesve të Këshillit të Evropës që qëndruan në Kosovë për të parë sa po respektohen të drejtat e pakicave.

https://www.rtklive.com/sq/news-single.php?

Qeveria e Kosovës në vazhdimësi iu bën thirrje serbëve për integrim brenda shoqërisë, policisë e ushtrisë. Beogradi ka qenë ai që përmes trysnisë, frikësimit e kërcënimeve i ka detyruar serbët të braktisin Policinë e Kosovës para dy viteve si shenjë proteste për çështjen e targave./The Geopost/