Perëndimi sërish cak i dezinformatave ruse

Perëndimi ishte cak i dezinformatave ruse gjatë javës që lamë pas.
Deklarata e zëvendësministrit të Jashtëm rus, Mikhail Galuzin se gjoja SHBA dhe BE po organizojnë një “fushëbetejë” të re në Gjeorgji ishte dezinformata e radhës.

“SHBA-ja dhe BE-ja duan të hapin një front të ri në kufirin e Rusisë, prandaj janë fokusuar te Gjeorgjia”, dezinformoi ai me qëllim të shpërqendrimit të publikut nga problemet dhe dështimet e tyre të brendshme.

E kreu i diplomacisë ruse, Sergei Lavrov, ka dezinformuar se SHBA-ja po përpiqet të ruajë hegjemoninë globale, e cila nuk është asgjë më shumë se, siç tha ai, një “lojë me shumën zero.” Ai dezinformoi duke pretenduar se “Uashingtoni po urdhëron shumë vende të bashkëpunojnë me SHBA-në kundër çdo konkurrenti.”

Lavrov përhap dezinformata dhe “falsifikon” fakte rreth politikës perëndimore për të fituar mbështetje për interesat ruse. Deklaratat e tij janë pjesë e propagandës ruse që synon të dobësojë reputacionin ndërkombëtar të Perëndimit dhe të justifikojë veprimet agresive të Rusisë në nivel ndërkombëtar.

“Se Perëndimi po furnizon terroristët me armë nëpërmjet Kievit” ishte dezinformata e radhës e zëdhënëses së Ministrisë së Jashtme ruse, Maria Zakharova.

“Perëndimi është furnizuesi kryesor i armëve për terroristët – ata arrijnë në Afrikë, Lindjen e Mesme dhe Evropën Perëndimore përmes Kievit. Vendet e NATO-s, po furnizojnë me armë një regjim terrorist. Gjëja më e keqe është se ata po e bëjnë këtë krejtësisht të pakontrolluar”, pretendonte ajo gjatë fjalës në Forumin Ekonomik Ndërkombëtar të Shën Petersburgut.

Deklarata e Zakharovës është një përpjekje tjetër e propagandës ruse për të shtrembëruar realitetin dhe për të akuzuar Perëndimin për lëvizjet e veta negative. Rusia e përdor këtë lloj dezinformimi si një mjet për të manipuluar opinionin publik dhe për të shkëputur vëmendjen nga aktivitetet e saj të paligjshme./The Geopost/