Dezinformon Vuçiq: Prishtina nuk do dialog, qëllimi është dëbimi i serbëve nga Kosova

Presidenti i Serbisë, Aleksandar Vuçiq, ka dezinformuar se Kosova po e refuzon dialogun në Bruksel dhe se qëllimi i saj është dëbimi i serbëve nga Kosova.

Çka deklaroi Vuçiq?

Prishtina nuk do dialog dhe bisedë. Qëllimi i parë është dëbimi i serbëve dhe shkatërrimi i popullit serb në Kosovë. Nuk kemi pasur kurrë një dialog të vërtetë dhe një bisedë të vërtetë. Ata përdorën marifete për të fajësuar në çdo mënyrë Beogradin për çdo të keqe që ndodh në terren. Sigurisht një ideologji që ka qëllimet e veta, e para prej të cilave është dëbimi i serbëve dhe shkatërrimi i popullit serb në Kosovë. Kur nuk ke asgjë për të ofruar, nuk ke synime të tjera, atëherë është e qartë se do ta bësh. Ata nuk duan dialog dhe bisedime, thonë “ne jemi shtet sovran dhe nuk kemi çfarë të flasim”.

Analiza:

Vuçiq ka dezinformuar se Kosova nuk dëshiron dialog në Bruksel kur Qeveria e Kosovës ka kërkuar vazhdimisht që Marrëveshja Bazë të nënshkruhet nga të dyja palët dhe të zbatohet në tërësi ndërkaq ka qenë Serbia dhe presidenti serb që ka refuzuar të nënshkruajë atë. Serbia ka dërguar një letër në vendet anëtare të Bashkimit Evropian ku është tërhequr nga kjo marrëveshje që është arritur në Bruksel. Herën e fundit që Vuçiq iu referua ka qenë Petar Petkoviq që ka refuzuar një agjendë të propozuar nga Bashkimi Evropian për të diskutuar me palën e Kosovës të kryesuar nga Besnik Bislimi.

Gjithashtu Vuçiq vazhdon të dezinformojë se në Kosovë po dëbohen serbët dhe se institucionet e Kosovës kanë në qëllim spastrimin etnik. Kosova është përpjekur për integrimin e serbëve po shpesh ata manipulohen nga Beogradi zyrtar dhe grupet me të cilët ai frikëson dhe shantazhon qytetarët. Serbët dolën nga institucionet e Kosovës me urdhër të Vuçiqit. Policia e Kosovës shpesh raporton raste të djegieve të veturave dhe pronave të serbëve në veri që nuk ndjekin urdhrat e Listës Serbe e Beogradit.

/The Geopost/