Dezinformon “Alo”: Gjendje shtet-rrethimi në Mitrovicë, policia maltreton serbët

Gazeta serbe “Alo” ka publikuar një titull të ekzagjeruar që nuk përkon me tekstin brenda artikullit. Në titull shkruhet se në Mitrovicë në Kosovë ka gjendje shtet-rrethimi dhe se Policia e Kosovës me tyta të gjata po bastis dhe maltreton serbët. 

Çka shkroi Alo?

“Gjendje e shtet-rrethimit në Mitrovicë, shihni sesi policia e Kurtit me tyta të gjata bastis dhe maltreton serbët”.

Këtë titull ka vendosur në artikull Alo, ndërsa brenda tekstit shkruan: “Tashmë gjatë paradites vërehej se njësitet speciale po grupoheshin në Mitrovicën e Jugut, kështu që rreth orës 13:00 do të hynin në veri të Mitrovicës përmes urës kryesore mbi Ibër dhe përmes Mëhallës së Boshnjakëve. Ata janë vendosur në kolona dhe aktualisht të paktën katër deri në pesë anëtarë të njësive speciale janë në çdo kryqëzim në qytet. Ata janë vendosur edhe para ndërtesave, dhe ka patrulla në rrugë”.

https://www.alo.rs/vesti/kim/989365/opsadno-stanje-u-kosovskoj-mitrovici-gledajte-kako-kurtijeva-policija-sa-dugim-cevima-vrsi-racije-i-maltretira-srbe-foto-video/vest?

Analiza:

“Alo” ka ekzagjeruar me qëllim titullin pa ofruar asnjë bazë dhe fakt, me qëllimin që të shkaktojë panik dhe një pasqyre të rreme për publikun serb.

Institucionet e sigurisë së Kosovës kanë rritur prezencën e tyre në veri të vendit pas sulmit terrorist më 29 nëntor në kanalin jetik të ujit Ibër-Lepenc nga i cili varet furnizimi me ujë të pijshëm për shumë zona dhe më e rëndësishmja nga ky kanal merret uji për ftohjen e termocentraleve të KEK-ut.

https://www.facebook.com/watch/live/?ref=watch_permalink&v=3438178699810739&rdid=IS30SE1GQ2z5RV6U

Policia e Kosovës ka njoftuar se tetë persona janë arrestuar me dyshimin për përfshirje në këtë sulm terrorist, ndërsa ka garantuar se qytetarët e pafajshëm nuk kanë nevojë të frikësohen nga veprimet e Policisë në veri sepse në shënjestër janë ata që shkaktuan sulmin terrorist.

Drejtori i Policisë së Kosovës, Gazmend Hoxha, iu ka bërë thirrje qytetarëve në veri që të bashkëpunojnë me Policinë për këtë rast dhe ka bërë thirrje gjithashtu që ata të ndihen të sigurt.

/G.Venhari