Në prani të udhëheqësve shtetërorë dhe përfaqësuesve të NATO-s, betohen 515 ushtarë të FSK-së

Sipas njoftimit të Ministrisë së Mbrojtjes, kjo gjeneratë përfaqëson numrin më të madh të rekrutëve të pranuar deri më tani në FSK, duke reflektuar interesimin në rritje të të rinjve për t’iu bashkuar kësaj force.

Rekrutët e rinj kanë dhënë betimin pas përfundimit me sukses të trajnimit nëntëjavor në Qendrën për Stërvitje Bazë, në kuadër të Komandës së Doktrinës dhe të Stërvitjes (KDS) në Ferizaj.

Në ceremoninë e betimit morën pjesë kryetarja e Kuvendit të Kosovës, Albulena Haxhiu, kryeministri Albin Kurti, ministri i Mbrojtjes, Ejup Maqedonci, si dhe zëvendësministrat Gegë Lleshi dhe Enis Kervan.

Të pranishëm ishin edhe sekretari i Përgjithshëm i Ministrisë së Mbrojtjes, Gafurr Dugolli, komandanti i FSK-së, gjenerallejtënant Bashkim Jashari, zëvendëskomandanti, gjeneralmajor Enver Cikaqi, si dhe drejtori i Ekipit Këshillues dhe Ndërlidhës të NATO-s (NALT), gjeneral brigade Thomas Schulte-Borghoff.

Ceremonia u ndoq gjithashtu nga ushtarakë dhe zyrtarë të lartë të FSK-së dhe Ministrisë së Mbrojtjes, përfaqësues vendorë e ndërkombëtarë, si dhe familjarë e miq të rekrutëve.

Pas përfundimit të trajnimit bazë dhe dhënies së betimit, 515 ushtarët e rinj do të vazhdojnë shërbimin e tyre në kuadër të Forcës së Sigurisë së Kosovës.

Ministria e Mbrojtjes ka uruar rekrutët e rinj, duke theksuar rëndësinë e përkushtimit, profesionalizmit dhe përgjegjësisë në shërbim të vendit dhe qytetarëve.

The GeoPost