Vuçiq sërish në përqafimin e Moskës – takim me ambasadorin rus mes tensioneve ndërkombëtare

Presidenti i Serbisë, Aleksandar Vuçiq ka treguar sërish lidhjet e ngushta politike me Moskën, pasi sot zhvilloi një takim me ambasadorin e Rusisë në Beograd, Aleksandar Bocan-Harçenko.

Vuçiq në një postim në llogarinë e tij zyrtare në Instagram ka bërë të ditur se gjatë bisedës janë shqyrtuar “zhvillimet aktuale ndërkombëtare dhe sfidat e sigurisë”, si dhe çështje me rëndësi për Serbinë, veçanërisht ato që lidhen me sigurinë energjetike dhe furnizimin e qëndrueshëm.

Në praktikë, kjo do të thotë se Serbia vazhdon të mbështetet në masë të madhe te Rusia – si për energjinë, ashtu edhe për mbështetjen politike – gjë që shumëkush e sheh si dobësi, pasi një varësi e tillë i lë Beogradit më pak hapësirë për të marrë vendime të pavarura në politikën ndërkombëtare.

Sipas Vuçiqit , bashkëbiseduesit kanë vlerësuar se është “e rëndësishme të ruhen kanalet e hapura të komunikimit dhe të vazhdohet bashkëpunimi pragmatik në fushat me interes të përbashkët”.

Megjithatë, në praktikë kjo nënkupton vazhdimin e balancimit mes Perëndimit dhe Kremlinit, një strategji që gjithnjë e më shpesh e vendos Serbinë në një pozitë të pakëndshme mes integrimeve evropiane dhe lidhjeve tradicionale me Rusinë.

 

View this post on Instagram

 

A post shared by Aleksandar Vučić (@buducnostsrbijeav)

/The Geopost/