Margetiq ftohet të dëshmojë në Prokurorinë e Bosnjës në rastin “Safari i Sarajevës”: Do t’i dorëzoj të gjitha provat

Gazetari hulumtues kroat, Domagoj Margetiq, i cili prej vitesh ka qenë një nga zërat më të zëshëm në publikimin e pretendimeve dhe kërkesave për hetim lidhur me rastin e njohur si “Safari i Sarajevës”, ka bërë të ditur se është ftuar nga Prokuroria e Bosnjës dhe Hercegovinës për të dhënë dëshmi në këtë çështje.

Përmes një njoftimi publik, Margetiq tha se sapo ka marrë ftesën zyrtare nga Prokuroria e Bosnjës dhe Hercegovinës për të dëshmuar në rastin “Safari i Sarajevës”.

Ai theksoi se kjo thirrje ka ardhur vetëm pak ditë pasi prokurorët e Prokurorisë së Bosnjës dhe Hercegovinës morën pjesë në një takim në agjencinë e Bashkimit Evropian, EUROJUST, ku u diskutuan hetimet për këtë rast.

“Do ta kujtoj, kjo thirrje vjen vetëm nja dy ditë pasi prokurorët e Prokurorisë së BiH ishin të pranishëm në një takim në agjencinë e BE-së, EUROJUST, për hetimet e kësaj çështjeje, e cila ngriti hetimet në nivelin e BE-së. Menjëherë pas takimit të EUROJUST për këtë rast, Prokuroria e BiH më ftoi të dëshmoj”, ka shkruar ai.

Margetiq ka bërë të ditur se do t’i përgjigjet ftesës së Prokurorisë dhe se do të dorëzojë të gjitha provat që posedon lidhur me rastin.

“Sigurisht që do t’i përgjigjem thirrjes dhe do t’i sjell të gjitha provat”, është shprehur ai.

Në fund të reagimit të tij, gazetari kroat ka bërë edhe një deklaratë të fortë, duke pretenduar se në rast se atij i ndodh diçka para se të dëshmojë, përgjegjësinë duhet ta kërkojnë te presidenti i Serbisë, Aleksandar Vuçiq.

“Dhe në rast se më ndodh ndonjë gjë para dëshmisë së klientit, kërkoni kabinetin e Aleksandar Vuçiqit në Kurorën e Andriqit në Beograd”, ka deklaruar Margetiq.