Kongresmeni amerikan Kieth Self: Anëtarësimi i Kosovës në NATO është kyç për stabilitetin e Ballkanit

Anëtarësimi i Kosovës në NATO është i domosdoshëm për të garantuar stabilitetin dhe ekuilibrin e sigurisë në Ballkan.

Ky ishte mesazhi i qartë i kongresmenit amerikan Kieth Self, i cili foli gjatë një Forumi të Sigurisë të mbajtur në Kongresin Amerikan, ku ishin të pranishëm edhe deputetë shqiptarë.

Duke folur për sfidat e sigurisë në rajon, Self theksoi se Ballkani mbetet një zonë e ndjeshme dhe potencialisht e paqëndrueshme, ndërsa theksoi se anëtarësimi i Kosovës në NATO do të ishte një faktor thelbësor stabilizues.

“Unë po kërkoj ekuilibër në Ballkan. Dua ekuilibër në Ballkan dhe mendoj se një nga pjesët kyçe – dhe e kam marrë si mision personal – është anëtarësimi i Kosovës në NATO, e cila do të ishte një forcë jashtëzakonisht stabilizuese në Ballkan. Prandaj duhet të bëjmë përparim në këtë drejtim dhe duhet t’u përgjigjemi kundërshtimeve të disa vendeve. Besoj se kjo është një pjesë kyçe e asaj për të cilën po flasim sot, sepse siguria në Ballkan – Ballkani sot, sipas mendimit tim, është një fuçi baruti – dhe ne duhet ta zgjidhim këtë dhe të sjellim stabilitet në rajon”, deklaroi kongresmeni amerikan.

Self theksoi se pa një arkitekturë të qëndrueshme sigurie, rajoni mbetet i ekspozuar ndaj tensioneve dhe ndikimeve destabilizuese, duke e bërë të domosdoshme një qasje proaktive nga SHBA dhe aleatët e saj për të forcuar sigurinë kolektive në Ballkan.

Në këtë forum ishte i pranishëm edhe Fatmir Mediu, kryetar i Partisë Republikane dhe bashkëdrejtues i punimeve të konferencës, i cili mbështeti fuqishëm idenë se anëtarësimi i Kosovës në NATO do të kishte ndikim pozitiv jo vetëm për Kosovën, por për të gjithë rajonin.

Mediu theksoi se pritshmëritë janë që vendet anëtare të NATO-s të bien dakord të paktën për nisjen e procesit të anëtarësimit të Kosovës, duke vlerësuar përpjekjet që institucionet e Kosovës po bëjnë për të përmbushur standardet e kërkuara nga aleanca.

“Të gjithë shpresojmë që të gjitha vendet e NATO-s të bien dakord të paktën, për të nisur procesin e anëtarësimit për Kosovën. Brenda NATO-s, kjo do të sjellë më shumë stabilitet dhe më shumë partneritet në rajonin tonë, në Ballkan. Dhe mendoj se ata po punojnë fort për të arritur çdo objektiv që kërkohet për të qenë pjesë e aleancës së NATO-s”, u shpreh Mediu.

Ai theksoi gjithashtu rëndësinë e bashkëpunimit të ngushtë mes vendeve të rajonit dhe aleatëve perëndimorë, duke nënvizuar se siguria kolektive është një interes i përbashkët.

Gjatë forumit, pjesëmarrësit diskutuan edhe për çështje më të gjera të sigurisë euroatlantike, përfshirë planin për rritjen e buxhetit të mbrojtjes në 5 për qind të Prodhimit të Brendshëm Bruto për vendet anëtare të NATO-s, raporton A2CNN.

Kjo temë u vlerësua si pjesë e përpjekjeve për forcimin e kapaciteteve mbrojtëse të aleancës në një kontekst global gjithnjë e më të pasigurt, ku Ballkani mbetet një nga rajonet që kërkon vëmendje të vazhdueshme strategjike.

Forumi i Sigurisë në Kongresin Amerikan shërbeu si një platformë për të riafirmuar mbështetjen e disa ligjvënësve amerikanë për integrimin euroatlantik të Kosovës dhe për të theksuar rolin kyç të NATO-s në ruajtjen e paqes dhe stabilitetit në Ballkan.