Von der Leyen pas varrimit të Mlladiqit: Vendet që lavdërojnë kriminelët e luftës nuk kanë vend në BE

Presidentja e Komisionit Evropian, Ursula von der Leyen, tha të mërkurën se ishte “e tmerruar” nga pamjet e varrimit të Ratko Mlladiqit në Beograd, duke theksuar se nuk ka vend në BE për ata që lavdërojnë kriminelët e luftës.

Duke folur në Parlamentin Evropian në Strasburg, gjatë fjalimit për gjendjen e Bashkimit Evropian, von der Leyen tha se Mlladiqi kishte kryer “krimet më të tmerrshme kundër njerëzimit”.

“U tmerrova nga pamjet e varrimit të Ratko Mlladiqit në Beograd javën e kaluar”, tha ajo, duke shtuar se “lavdërimit të kriminelëve të luftës thjesht nuk i ka vendi në Bashkimin Evropian”.

Mlladiqi u varros në Beograd me nderime ushtarake, ndërsa në ceremoninë e varrimit morën pjesë edhe zyrtarë të lartë serbë. Ngjarja shkaktoi reagime të ashpra ndërkombëtare, përfshirë nga zyrtarë të Bashkimit Evropian. Reuters raportoi se von der Leyen, në një reagim më 8 shtator, i kishte cilësuar pamjet nga varrimi si “tronditëse” dhe kishte paralajmëruar se mbështetja zyrtare ndaj Mlladiqit mund të dëmtojë perspektivën evropiane të Serbisë.

Ratko Mlladiqi, ish-komandant i Ushtrisë së Republikës Srpska, u dënua nga mekanizmat ndërkombëtarë të drejtësisë për gjenocid, krime lufte dhe krime kundër njerëzimit. Ai vdiq më 27 gusht, ndërsa vuante dënimin me burgim të përjetshëm.

Në fjalimin e saj, von der Leyen e lidhi çështjen me procesin e zgjerimit të BE-së, duke përmendur Ukrainën, Moldavinë dhe vendet e Ballkanit Perëndimor si vende që e kanë të ardhmen brenda Bashkimit Evropian.

Ajo tha se Komisioni Evropian së shpejti do të propozojë udhërrëfyes për kandidatët që kanë bërë përparimin më të madh në procesin e anëtarësimit, ndërsa theksoi se zgjerimi do të vazhdojë të bazohet në merita.

“Respekti për vlerat tona nuk negociohet”, tha von der Leyen, duke e lidhur këtë parim me drejtësinë, të vërtetën dhe respektin për viktimat e luftërave në ish-Jugosllavi./The Geopost/