Sikorsky: Pasuria e ngrirë ruse nuk do t’i kthehet Moskës

Ministri i Jashtëm i Polonisë, Radosław Sikorsky, deklaroi se pasuria shtetërore ruse e ngrirë në Evropë nuk do t’i kthehet Moskës, duke thënë se këto mjete mund të përdoren për rindërtimin e Ukrainës dhe financimin e nevojave të saj në fushën e mbrojtjes.

Duke folur në Forumin e së Ardhmes së Evropës në Varshavë, Sikorsky tha se Bashkimi Evropian, pas fillimit të pushtimit rus të Ukrainës, ka ngrirë më shumë se 200 miliardë euro pasuri shtetërore ruse. Sipas tij, këto mjete mund të luajnë rol në parandalimin e shkatërrimeve të mëtejshme në Ukrainë dhe në uljen e kostove të ardhshme të rindërtimit të saj, transmeton Kyiv Post.

“Ato tani mund të përdoren për të parandaluar shkatërrime të mëtejshme dhe për të ulur kostot e ardhshme të rindërtimit”, tha Sikorsky.

Çështja e përdorimit të pasurisë së ngrirë ruse prej muajsh ka shkaktuar debate brenda Bashkimit Evropian. Komisioni Evropian ka propozuar modele përmes të cilave këto mjete do të përdoren për financimin e mbrojtjes së Ukrainës, por vendet anëtare nuk kanë arritur një marrëveshje, ndër të tjera për shkak të rreziqeve ligjore dhe financiare.

Sipas të dhënave nga institucionet evropiane, Ukrainës i nevojitet financim shtesë për mbrojtjen, ndërsa më shumë se 100 deputetë të Parlamentit Evropian kohët e fundit u kanë bërë thirrje liderëve të BE-së që të rishqyrtojnë mundësinë e përdorimit të pasurisë së ngrirë ruse.

Sikorsky paralajmëron për kërcënim afatgjatë

Sikorsky paralajmëroi gjithashtu se përfundimi eventual i luftës në Ukrainë nuk do të nënkuptonte automatikisht edhe fundin e sfidave të sigurisë që Polonia dhe vendet e tjera evropiane i shohin në marrëdhëniet me Rusinë.

Ai u bëri thirrje vendeve anëtare të BE-së të vazhdojnë rritjen e investimeve në mbrojtje dhe zhvillimin e kapaciteteve të cilat, siç tha, duhet të kenë efekt parandalues.

Sipas tij, Polonia aktualisht shpenzon rreth shtatë për qind të PBB-së për mbrojtjen, ndërsa vendet anëtare të NATO-s nga BE-ja kanë rritur ndjeshëm shpenzimet ushtarake gjatë dekadës së fundit.

“Duhet të jemi mjaftueshëm të fortë për ta frenuar Putinin”, tha Sikorsky.

Ai veçanërisht theksoi nevojën për zhvillimin e teknologjive të reja ushtarake, duke vlerësuar se siguria e ardhshme evropiane nuk do të varet vetëm nga shuma e mjeteve të ndara për mbrojtje, por edhe nga kapacitetet konkrete ushtarake që zhvillohen me këto mjete.

Ndër prioritetet që ai përmendi janë sistemet me rreze të gjatë veprimi, analiza e të dhënave me ndihmën e inteligjencës artificiale, prodhimi dhe përdorimi në masë i dronëve, kapacitetet kibernetike, si dhe sistemet për mbrojtje kundër mjeteve ajrore pa pilot.

“Nuk mund të luftosh kundër dronëve me shkopinj dhe gurë”, tha ministri polak, duke theksuar nevojën për modernizimin e kapaciteteve ushtarake evropiane.

Sikorsky javën e kaluar qëndroi në Kiev, ku mori pjesë në konferencën Strategjia Evropiane e Jaltës. Me atë rast, ai foli edhe për mundësinë e zhvillimit të stërvitjeve më intensive ushtarake të NATO-s pranë Kaliningradit rus.

Sipas tij, stërvitje të tilla mund të ndikojnë në planifikimin ushtarak rus, pa hyrë drejtpërdrejt forcat e NATO-s në territorin e Rusisë.

Deklaratat e tij vijnë në një kohë kur vendet evropiane po përpiqen të rrisin kapacitetet e tyre mbrojtëse dhe njëkohësisht të gjejnë një model afatgjatë për financimin e Ukrainës. Çështja e statusit të ardhshëm të pasurisë shtetërore ruse të ngrirë mbetet një nga çështjet kryesore në diskutimet evropiane për financimin e Ukrainës dhe rindërtimin e saj pas luftës.