Qeveria e re e Serbisë do të përfshijë një ish-shef të shërbimit sekret të sanksionuar nga SHBA, me lidhje të ngushta me Rusinë

Qeveria e re e Serbisë do të përfshijë një ish-shef të inteligjencës, i cili kishte lidhje të ngushta me Rusinë dhe ishte sanksionuar nga Shtetet e Bashkuara, tha të martën kryeministri i emëruar i vendit.

Aleksandar Vulin do të shërbejë si një nga disa zëvendëskryeministra, tha Millosh Vuçeviç ndërsa njoftoi përbërjen e kabinetit të tij të ardhshëm, i cili do të votohet në detyrë nga parlamenti serb në ditët në vijim.

Serbia kërkon zyrtarisht anëtarësimin në Bashkimin Evropian, por ka mbajtur marrëdhënie miqësore me Rusinë dhe ka refuzuar t’i bashkohet sanksioneve perëndimore kundër Moskës për luftën në Ukrainë.

Përfshirja e Vulin në qeverinë e re tregon për forcimin e marrëdhënieve me Rusinë, megjithëse Serbia ka shpallur zyrtarisht një kurs pro-BE.

Lëvizja opozitare Qytetarët e Lirë tha se me përfshirjen e Vulin në qeverinë e re, “Serbia nominalisht nuk është më në rrugën evropiane”.

Partia Liberale tha se emërimi i Vulin paralajmëron “izolimin ndërkombëtar të Serbisë, konfliktet në rajon, lidhjet me Rusinë dhe futjen e ndalimeve për të gjitha liritë civile në vendin tonë”.

Në korrik, SHBA vendosi sanksione ndaj Vulin, duke e akuzuar atë për përfshirje në dërgesat e paligjshme të armëve, trafik droge dhe abuzim me detyrën publike.

Zyra e Departamentit të Thesarit të SHBA-së për Kontrollin e Pasurive të Huaja tha se Vulin përdori zyrën e tij publike për të ndihmuar një tregtar armësh serb të sanksionuar nga Shtetet e Bashkuara të lëvizte dërgesat e paligjshme të armëve përtej kufijve të Serbisë. Sipas autoriteteve amerikane, Vulin akuzohet edhe për përfshirje në një rrjet të trafikut të drogës.

Vulin dha dorëheqjen si drejtor i agjencisë serbe të inteligjencës BIA pas vendosjes së sanksioneve ndaj tij. Ai kishte shërbyer më parë si shef i ushtrisë dhe policisë.

Vulin së fundmi mori dy Medalje Nderi nga Rusia, njëra nga Shërbimi Federal i Sigurisë Ruse dhe tjetra iu dha nga Presidenti rus Vladimir Putin.

Vuçeviq, kryeministri i ri i caktuar, ka qenë më parë ministër i mbrojtjes i Serbisë.

Formimi i qeverisë së re vjen pas zgjedhjeve të tensionuara parlamentare në dhjetor, në të cilat partia populiste e krahut të djathtë të Presidentit Aleksandar Vuçiç fitoi shumicën e vendeve në asamblenë prej 250 anëtarësh. Votimi ngriti tensione politike pasi vëzhguesit vendas dhe ndërkombëtarë raportuan parregullsi të gjera. Një grup opozitar organizoi protesta në rrugë pas zgjedhjeve./AP/