G-7 i bën thirrje Bjellorusisë t’i japë fund krizës së emigrantëve

Grupi i shteteve të G-7 dënoi atë që e quajti “orkestrim të migrimit të parregullt përtej kufijve” nga qeveria e Bjellorusisë, pasi Polonia fqinje raportoi përpjekje të reja për kalim në kufirin e saj.

“Ne i bëjmë thirrje regjimit të ndërpresë menjëherë fushatën e tij agresive dhe shfrytëzuese për të parandaluar vdekjet dhe vuajtjet e mëtejshme”, thanë në një deklaratë të përbashkët ministrat e jashtëm të Kanadasë, Francës, Gjermanisë, Italisë, Japonisë, Britanisë dhe Shteteve të Bashkuara. “Organizatat ndërkombëtare duhet të kenë akses të menjëhershëm dhe të papenguar për të ofruar ndihmë humanitare.”

Vendet evropiane akuzojnë presidentin e Bjellorusisë, Aleksandër Lukashenko, se ka shtyrë mijëra emigrantë, kryesisht nga Lindja e Mesme, të kalojnë kufirin ilegalisht, si shenjë hakmarrje për sanksionet e Bashkimit Evropian që ndëshkojnë Bjellorusinë për goditjen e protestuesve që janë pro-demokracisë. Bjellorusia ka mohuar se ka orkestruar grumbullimin e emigrantëve në kufi.

G-7 ka thënë se Bjellorusia po përpiqet të “humbasë vëmendjen” nga shkeljet e saj të ligjit ndërkombëtar dhe të drejtave të njeriut. Deklarata shprehu solidaritet me Poloninë si dhe me dy fqinjët e tjerë të Bjellorusisë, Lituaninë dhe Letoninë.